1643/2025-2026

Champhai, dated 29th September 2025: Champhai District Level Narco Coordination Centre (NCORD) Committee chu vawiin chawhnu dar 12:30 khan Champhai Bawrhsap leh Chairman ni bawk Pu Mohammad Aaquib hovin DC Conference Hall, Keifangtlangah an ṭhukhawm.

Chairman Pu Mohammad Aaquib chuan Champhai District chhunga ruihhlo dona kawnga sawrkar thuneitute leh Tlawmngai pawl te inkarah thawhhona tha tak a awm thin chu lawmawm a tih thu a sawi a, ramri depa Champhai a awm avangin ruihhlo kal kawng pakhat a ni a, a dan chah kawngah theihtawp chhuah chhunzawm zel a tul thu a sawi a.

Champhai SP Lokeshwaran R chuan meeting agenda sawifiahna neiin ruihhlo tawlh leh hman sualna a pung nasa tih a sawi a. District NCORD member te chu ruihhlo dona kawngah theihtawp chhuaha awmze nei zawk leh mumal zawka khuahkhirh a nih theihna tura ngaihtuahna seng zel turin a chah bawk a ni.

He hunah hian Champhai District Police, Excise & Narcotics Champhai, line Department hrang hrang ten ruihhlo do kawnga hma an lakna te an sawi a. September 2025 chhungin Champhai District Police-ten ND&PS Act, 1985 hnuaiah ruihhlo kaihhnawiha in hnam hnawih mi 25 manin, case 19 an ziaklut a, , Heroin kg 3.282, Methamphetamine kg 74.852, Alprazolam kg 4.470, codein gram 1.6, ruihhlo phurh nana hman lirthei ke li nei pahnih (2) leh lirthei ke pahnih nei pahnih (2) man a ni bawk. Ruihhlo man zawng zawng hlut zawng hi nuai 1166.568 (₹11,66,56,800) man hu a ni.

September, 2025 vek khan Excise & Narcotics Department Champhai chuan ND&PS Act, 1985 hnuaiah ruihhlo kaihhnawiha in hnam hnawih mi 10 manin case 8 an ziak lut a, Heroin kg 2.772, Methamphetamine kg 42.088 leh Ganja gram 29.9 leh ruihhlo phurh nana hman lirthei ke hnih nei pahnih (2) an man bawk a ni.

Excise & Narcotics Department Champhai hian Drugs Awareness Campaign hi Champhai Zote VC leh YMA member te tan leh zirna in pathum - Springdale Academy Zotlang, Champhai, Govt. Champhai College leh Govt. Eastern High School, Biate ah te September, 2025 khan an nei bawk a ni.