3276/2022-2023
Champhai, the 17th January, 2023: Ruihhlo leh a kaihhnawih hrang hrang laka India ram a fihlim theihna tura Sawrkar laipui Ministry of Social Justice & Empowerment leh Mizoram State Social Defence & Rehabilitation Board-te tangkawp hnuaia National Action Plan for Drug Demand Reduction (NAPDDR) hmalakna, 'Nasha Mukh Bharat- Drug Free India Campaign' kalpuitu District Level Nasha Mukt Bharat Abhiyaan (NMBA) Committee, Undivided Champhai District chu vawiin chawhnu dar 1 khan Champhai District Bawrhsap Pu James Lalrinchhana, Chairman, District Level Nasha Mukt Bharat Abhiyaan hovin DC Conference Hall-ah an thukhawm.

Pu James Lalrinchhana chuan India ram puma drugs hluarna district 372 zinga ruihhlo do beihpui thlak kawnga hmalakna tura thlan zingah Undivided Champhai District a tel thu sawiin, Nasha Mukh Bharat Abhiyan (NMBA) chu hemi kawnga hma la tura din line department hrang hrangte telna a ni a, inpawhtlang taka thawhho a pawimawh a ni, a ti a. District Level Narco Coordination Centre (NCORD) Committee hmalaknate nena inngheng tlat anih thu leh kalkawp tlan tir thiam a pawimawh thu a sawi a. Hnathawk rual thalai tam tak ruihhloin a tibuai leh hnathawk tlak lova a chhuah chu veiawm a tih thu sawiin, ruihhlo do kawnga theihtawp chhuah tlan a tul thu a sawi bawk. Kalkhawmte chu ruihhlo hman sual ven kawnga hmalaknaah tha thlah lova tang zel tur leh vahchhuahna apiangah remchang laa midangte zirtirtu nih tum theuh turin a chah a ni.

Member Secretary, Nasha Mukt Bharat Abhiyaan, Champhai District Pi PB Liansangpuii, Coordinator, Mizoram Social Defence & Rehabilitation Board, Social Welfare & Tribal Affairs Department hnen atangin Nasha Mukh Bharat Abhiyaan kaltlanga ruihhlo do kawnga hmalakna hrang hrangte ngaihthlak a ni a. NMBA buatsaihin January ni 13, 2023 khan District Hospital Champhaiah Voluntary Blood Donation Camp huaihawt a ni.

He hunah hian thutkhawm hmasa December ni 19, 2022 a thurel bawhzui anih dante ngaihthlak a ni a. Nasha Mukh Bharat Campaign kaltlanga kumin chhunga Champhai District-a hmalakna tur Annual Action Plan duante zirho a ni a; hmalakna kalpui mek leh thla tina hmalakna kalpui turte sawiho a ni a. Ruihhlo ngai enkawl leh chhawmdawlna pek ngai bikte buaipui dan turte sawiho a ni bawk a. Zirna in leh hmunhma danga awareness campaign neih nan tun thla chhungin ruahmanna duan fel hman nise tih a ni a, fund dawn anih veleh theihtawp chhuaha hmalak nghal char char tum a ni. NMBA hnuaia sub-commitee siamthat ngaite siam rem nise tih a ni a. Zirna in bul metre 100 huamchhunga vaihlo leh a kaihhnawih zuarte Anti Tobacco Squad te'n dapchhuah hna kalpui thin se an ti bawk.

Nasha Mukh Bharat Abhiyaan - Drug Free India Campaign hnuaiah hian India rama District 272 ahte ruihhlo do hmalakna kalpui hmasak a ni a. Nikum August thla khan District 100 dang telh belh leh a ni a, tun dinhmunah District 372 ah kalpui mek a ni. Aizawl, Kolasib leh Champhai District-te chu Mizoram atanga he campaign kalpuinate an ni a; Narcotics Control Bureau (NCB) leh Ministry of Social Justice & Empowerment kaltlanga National Survey neihin drug hluarna District ni a a tarlan zulzuia thlante an ni.