1850/2025-2026
Champhai, dated 10th October 2025 : Champhai District Secondary School Sports chu vawiin khan khar a ni a, Govt. GM High School an Champion.
Secondary School Sports Kharna hun hi Pi K. Lalsiamliani, DEO & DPC Samagra chuan a kaihruai a, Pu Mohammed Aaquib, District Bawrhsap chuan khuallian niin a hmanpui a, thusawiin, Sports hlawhtling tak nei thei tura hmalatu Education Officer leh Staff te bakah Zirtirtu zawng zawngte chungah lawmthu a sawi a, a hlawhtlinna tak tak hmu tura theihtawp chhuaha mahni school tana thawkchhuak zirlai zawng zawngte chungah lawmthu a sawi bawk.
Champhai hi ruihhlo laka thianghlima siam tum tlat tur leh faina kawngah pawh mahni zawnah theuh hma la zel turin a sawm a, kan hmalawka Hnahsin Kut hman turah khualzin tam tak an rawn kal dawn avangin faina kan ngaih pawimawh a tul, a ti a, rawn kal zel an chakna tura hma lo lak chu kan tih tur a nih thu a sawi.
He hunah hian Pu K. Lalremtluanga, District Sports Organising Secretary hnen atangin report ngaihthlak a ni a, Sports ah hian school 31 telin discipline hrang hrang 7 hmangin an inel a ni. Pu Ngurhmingliana, Asst. Secretary kaihhruainain result puan niin lawmman sem nghal a ni.
Champhai District Secondary School Sports ah hian Gold medal 11, Silver 9 leh Bronze 4 la tur Govt. GM High School chu pakhatna an ni a, medal 24 an la a ni. Govt. Ruantlang High School chu pahnihna niin Gold 5, silver 3 leh bronze 6 lain medal 14 an la a, Zokhawthar Secondary School te chu pathumna an ni a, gold 3, silver 3 leh Bronze 1 lain medal 7 an la ve bawk. Best Boy atan Gold Medal 2 latu Jonathan Lalruatfela, Govt. GM High School chu thlan a ni a, Best Girl atan Lalnunhlui, Govt. GM High School chu thlan a ni a, a ni hian gold medal 4, silver medal leh bronze medal 1 ve ve a la a, a medal lak zawng zawng hi 6 a ni.
