No.7535/2020-2021

Mizoram sawrkar Health & Family Welfare Department leh National Health Mission (NHM) bultumin vawiin khan damdawi leh hridanna vaccine pekchhuah leh enkawl kawnga hriat tulte inzirtirna, Drugs and Vaccine Distribution Management System (DVDMS) Training chu I&PR Conference Hall, CHANEM, Champhai-ah neih a ni.

He hunah hian Dr.Mary Zohmingliani, State Nodal Officer (SNO), DVDMS, Pu P.C Laltlanzuala, Programme Manager, DVDMS leh Pu Zoremmuana Khiangte DEO, DVDMS te’n Drugs and Vaccine Distribution Management System chungchanga hriat tur hrang hrangte kalkhawmte an zirtir a ni.

Drugs and Vaccine Distribution Management System (DVDMS) hi software platform Drugs and Vaccine Supply Chain Management felfai taka siam awmna niin, hei hian Purchase order, inventory management, Vaccine Supply Chain Management leh damdawi semchhuah dante a huam a ni. Heng bakah hian Health programme hrang hrang hnuaia receipt, quality control, vaccine, damdawi leh damdawiin kaihhnawih bungrua chi hrang hrang State chhunga pekchhuah dante a enkawl tel thei bawk a ni. DVDMS-in a tum ber chu Public health facilities zawng zawng te’n an mamawh ang damdawi leh hmanruate, an mamawh zat leh mamawh hunahte an tlakchhamloh nan leh damlote mamawh ang damdawi leh hmanruate a hun taka hman theih tura a awm reng theih nana hmalak a ni.

A thawhkhatna atan CMO Office, District Hospital, CHC leh PHC-ahte Drugs and Vaccine Distribution Management System hi kalpui tum a ni a. DVDMS kaltlang hian Central Medical Store, Aizawl atanga damdawi leh thil dang District leh CHC/PHC a semchhuahte leh damlo hnena semchhuah leh chhawnte a vil zui theih dawn a. Level hrang hranga ruahmanna siam leh tihpuitlin pawh a awlsam phah zawk dawn avangin damdawi leh hmanrua neih ang angte pawh tangkai zawk leh a tam thei ang berin damlote tana hman theih turin a awm dawn a ni.

DVDMS hi India rama State hrang hrang te’n e-Aushadhi application hmangin an kalpui deuh vek tawh a. Mizoramah tunah hian he application hi hmang tan ve tura hmalak mek niin, District Hospital, Chief Medical Officer, Community Health Centre leh Primary Health Centre hrang hrang Drug Store-a mawhphurtu Medical Officer leh Pharmacist-te chu Drugs and Vaccine Distribution Management System (DVDMS) training pek mek an ni.

DVDMS hian damdawi chungchang ngaihven leh a kaihhnawihte group, sub group leh category hran hrana then leh code siamte, automatic indent generation kalpuite, damdawi dam hunchhung leh thi tawh  chhinchhiahte, awlsam zawka zawn dan tur bithliahte, damdawi dahkhawlna hmun hrang hranga semchhuahte, level hrang hranga thena ngun taka enkawl leh damdawi neih dante vila record felfai taka vawn that a tum dawn a ni.

Vawiin training hi Dr. P.B Zodingliana SMO Champhai chuan a telpuia, CMO Champhai huamchhunga CHC leh PHC hrang hrang atanga lokal Medical Officer 14 te, Staff Nurse, Pharmacist leh Block Accounts Manager-te an tel a ni.

Ruahman dan chuan naktuk hian ‘Health Management Information System’ tih hmanga training neih chhunzawm tur a ni a, naktip hian 'Reproductive Child Health (RCH) Programme' chungchang inzirtirna  neih tum  a ni bawk.