Vawiin khan Champhai DC Conference Hall, Keifangtlangah kumin inthlanpui lo awm tur puala  inpuahchahna kal zelah District Master trainer-te tan  Training buatsaih a ni.

Training-ah hian thupui hrang hrangte zirhona neih a ni a. Pu K.Vanlalthiana, RO, 22-Tuichang A/C hnen atangin Polling Party-te tihtur, mawhphurhna te leh election kaihhnawih form pawimawhte hman dan tur ngaihthlak a ni a. Pu Vanlalchhuanliana, ARO, 25-East Tuipui Assembly Constituency-in Postal Ballot hman dan leh buaipui tulte   a sawi bawk a. Pi Lalhruaitluangi, ARO, 21-Lengteng A/C-in Vote thlak ni a thil tihtur leh report pek dan turte a sawifiah a. Pi Rebecca Laldinmawii Hrahsel, ARO, 23-Champhai North-in EVM leh VVPAT hnathawh leh hman dan a zirtir bawk a ni.

Master Trainer-te hian November Ni 1, 2018 hian Govt. Gandhi Memorial High School, Champhaiah Polling Party hrang hrang leh inthlan kaihhnawiha thawkchhuak turte tan a zau thei ang berin zirtirna an pe leh dawn a ni.