3557/2022-2023
Champhai, the 13th February, 2023: Power & Electricity Department, Champhai buatsaihin vawiin chawhma dar 11 khan electric hman chungchanga mipuite him tlanna tura inzirtirna, 'Public Awareness on Electricity Safety' chu I&PR Auditorium, CHANEM Building-ah neih a ni.
He hun Pu C.Lalhruaitluanga, JE, Champhai Power Sub Division kaihhruaiah hian Resource person Er. John Lalthlengliana Khiangte, SDO, Champhai Power Sub Division hnen atangin electric hman kawnga vantlang mipuite tana tih leh tih loh tur te, chenna ina electric hman kawnga fimkhur tulna te, kangmei laka inven leh kang thelh chungchanga hriattur pawimawhte bakah safety clearance chungchangte ngaihthlak a ni.
Er. John Lalthlengliana Khiangte chuan mipuite chu electric wiring man tlawm zawng mai lova a tha leh him chauh hmang turin a chah a. Energy meter khawih chingpen leh energy meter kaltlang lova electric pawha hman ching lo turin mipuite a chah a. Sawrkar pawmpui Electrical Licensed Contractor-te kutah inchhunga electric pawh leh zam hna a innghah thu sawiin, internal wiring chungchanga harsatna awmte an hnena thlen tur anih thu a sawi a, wire rawng hrang hlak line tinte hriat hran mai theih tura hman a pawimawh thu a sawi a. Transformer dah belhna tur hmun ngaihtuaha vangtlang hmun ruak remchang laite P&E Department tana zuah hram a pawimawh thu leh, Transformer chawmtu 11kV line kalkawngte hmuh a harsat tawh avangin ruahmanna siam ho thin a tul thu a sawi a. Electric Accident laka him nan Danin a phal baka electric line hnaiha In sa lo tura zirtirna mipuite hnena pek tam a tangkai thu a tarlang bawk.
MCB hmang lova Isolator hman thinin harsatna a thlen dante a sawifiah bawk a. Hmun tam takah inverter line neutral leh current pangngai neutral suihzawm mai ching an awm thin thu tarlangin, hei hian current leak a siam palh thei a, electric bill a ti tam thei bawk a ni, a ti a. Kalkhawmte chu thahnem ngai taka midangte zirtirna pe chhawng turin a sawm a. Power supply hnianghnar leh him taka hman anih theihna tura theihtawp chhuah turin a sawm nghal bawk.
He hunah hian Electricity Safety Manual, Indian Electricity Rule 1956, Central Electricity Authority (CEA) Regulations 2010, JERC dan bu te bakah Electricity Wiring Colour Code (NEC&IEC) chungchangte zirho a ni.
Grid Power Supply hi Champhai chuan kum 2014 atang khan voltage sang zawk leh chak tha zawk 132 kV level-in a dawng a. 132 kV a power supply dawn hi 33 kV Sub-Station hrang hrang Keifangtlang, Lower Sub-Station Electric veng, Hnahlan, Khuangleng, Khawbung leh Farkawn-ahte sem chhuah a ni a, hengte atang hian 33 kV level chu 11 kV levelin Feeder hrang hrangah mipuite chawmtu Distribution Transformer-ahte pek chhuah leh thin a ni. Champhai khawpui chhungah hian mipuite chawmtu Transformer hi veng hrang hrangah 83 zet hman mek a ni a, Transformer lian 12.5 MVA Keifangtlanga hman mek bakah a dang 12.5 MVA Transformer bun tuma hmalak mek a ni bawk.
Vawiin hun hmanah hian VC, NGO, MJA leh Consumer's Union Champhai aiawhte an tel a ni.
