Vawiin khan Champhai Town Sanitation Task Force buatsaihin High School Level Drawing and Painting Compettition chu I&PR Conference Hall, CHANEM Building, Champhaiah neih a ni a. He intihsiaknaah hian Champhai khawpui chhunga High School 13 atangin Zirlai lemziak thiam 36 te an tel a, intihsiakna kaltlang hian lemziak leh cheimawi hmanga fai inzirtirna leh pholanna  neih a ni.

Intihsiakna hawnna hun tawi hi Pu C.Lalengkima, Social Development Specialist, UD&PA Champhai chuan kaihruaiin intihsiakna neih dan tur a sawifiah  a. He huna khuallian  Dr Lallawmkima DIPRO Champhai chuan India ram sawrkarin faina kawngah nasa taka tan a lak thu leh thingtlang kilkhawr ber thlengpha ruahmanna a siam thu a sawi a. Khawpui leh thingtlang khuate tana inelna pawh siam anih thu leh Mizoramah  pawh khawtlang huapa tanlak anih thin thu a sawi a. Zirlai lemziak thiam kalkhawmte chu faina nunpuitu leh midangte zirtirtu nih tum turin a fuih a. Lemziak leh cheimawi thiamna chu faina zirtirna leh puandarhna hmanrua atana hmanga, nakin zel pawha lemziak hmanga fai rawngbawl thin turin a chah bawk a. Champhai Town Sanitation Task Force hmalaknaa khawpui chhunga fai inzirtirna kalpui a ni thin chu a fakawm hle a ni, a ti a. Lemziak thiamte chu inelna thianghlim tak hmachhawna theihtawp chhuah tura fuihin duhsakna a hlan nghal a ni.

Intihsiaknaa tithate hnenah Pi Esther Leihang, Treasury Officer, Champhai chuan lawmman hlanna a nei a. Pakhatna chu Remruatfeli, Bethel Mission School niin, lawmman pawisafai Rs 3000/- leh certificate a dawng a. Pahnihna chu JH Lallianpari, Bethel Mission School niin pawisafai Rs 2000/- leh certificate a dawng a, Lallawmawma PES Zotlang chu pathumna niin pawisafai Rs 1000/- leh certificate a dawng a. Heng bakah hian a tel zawng zawngte hnenah participation prize pek vek an ni a. He hun hi Zirlai lemziak thiamte chuan an hlut hle a ni.

Fai inzirtirna hmanga lemziak leh cheimawi intihsiakna hi Mizoram khawpui fai inelna kalpuina kentel, a zau thei ang bera mipuite hnena faina kawnga zirtirna thlengpha tur siamna a ni a. Lemziak leh cheimawi tha bikte hi khawlai ualau laia bangahte nemkai tur a ruahmanna kalpui a ni.