Tukin khan Champhai District Cleanliness Week Committee buatsaihin Faina Hapta 2018 hawnna programme chu CHANEM Buillding tualah neih a ni a. He hunah hian Pu K.Vanlalthiana, Additional DC Champhai chu khuallian a ni a, Faina Hapta 2018 hi hawngin hemi puala hnatlangte a vailiam a ni.

Hawnna hunah thu sawiin Pu K.Vanlalthiana chuan Fai hi Sakhuana dawta kan ngaihpawimawh hmasak ber tur ani tiin, Champhai District mipuite chu faina kawnga nasa zawka tan la thar leh turin a sawm a. Thinlung leh rilru thianghlim hmasain pawnlam landan a siam chawpchilh mai thin avangin faina chu chhunglam a tanga tan chi anih thu a sawi bawk a ni.

Tukin Faina hapta hawnna programme hi Pi Laldinfeli, SDC Champhaiin a kaihruai a. Pu C. Lalengkima, SDS, UD&PA-in report tawi leh hnatlan dan tur a sawifiah a. Faina Hapta pualin rally neih niin, hemi hnu hian Area Level Federation-te thuang liah inthenin khawpui chhung hmun hrang hrang tifaiin an hnatlang chhunzawm nghal a ni.  

Faina hapta hawnna hunah hian Sawrkar Department hrang hranga hotute, khawtlang hruaitute, UD&PA hnathawk leh DAY-NULM hnuaia Area Level Federation member hrang hrangte an tel a. Faina Hapta 2018 pual hian fai inelna buatsaih a ni leh dawn a; Sawrkar Pisa, Zirna In, Restaurant, Anganwadi leh Veng hrang hrangahte endikna neih a ni dawn a, High School naupangte tan On the Spot Essay Writing Compettition buatsaih a ni ang a, Middle School naupangte tan On the Spot Painting Compettition buatsaih ani dawn bawk a. Inelna a tithate hnenah kharna neih hunah lawmman pawisa fai leh certificate hlan an ni ang.

Kumin Faina Hapta kharna hun hi October Ni 9, 2018 hian Govt. Champhai College Multipurpose Hall-ah neih tura ruahman a ni a. He hunah hian Fai inelna a tithate hnenah lawmman hlanna neih a ni ang.