No.5692/2020-2021 

Dated Champhai, the 2nd October, 2020: Kum tina hman thin faina kawnga inzirtirna leh infuihtharna hun, Faina Hapta (Cleanliness Week) October ni 2-9, 2020 chhung awh tur chu vawiin chawhma khan CHANEM Building-ah Khuallian Dr. Z.R. Thiamsanga MLA, H&FW Board Vice Chairman chuan a hawng. Veng leh khaw hrang hrangah fai hnatlang leh inzirtirna neih chhunzawm a ni.

Khuallian Dr. Z.R. Thiamsanga chuan Faina hapta pualin Champhai District mipuite chibai a buk a. Faina hapta hman tur chu Champhai  fai, thianghlim leh hrisel siam tura hmalakna Clean, Beautiful and Healthy Champhai Project nen a inmil hle thu sawiin, faina leh changkanna chu a kalkawp tlat a, In leh bungraw tha tak tak nei mah i la faina hapta kan hman a ngaih chhung chuan kimlo a awm tlat a ni, a ti a. Zosap te'n thianghlim kawngah hma hruaia zirtirna an lo kalpui chu vanneihthlak a tih thu sawiin, fai inzirtirna zau zawka kalpui turin khawtlang hruaitute, Kohhran, Zirtirtu leh Media-te an pawimawh hle a ni, a ti.

Health & Family Welfare Board Vice Chairman chuan sawrkar laipuiin faina kawngah nasa taka hma a lak thu sawiin,  India chuan faina lamah hmuhtheiha hma a sawn thu a sawi a, India hnampa pianchamphaphak ni a Faina hapta hman tan a ni chu a inhmeh hle a ni, a ti a.  Mipuite hnena tui thianghlim pek, ram ngaw humhalh, bawlhhlawh lakkhawm leh sawngbawl kawngah kan zavaia tanho thiam angai dawn ani tiin, faina hapta chuan mipuite thinlungah fai, thianghlim leh hrisel duhna thinlung leh rilru thlenga thianghlimna  tuh se a duh thu a sawi a. Champhai district chu hmun dangte tana  entawntlak leh zirtirtu ni thei se a duhawm hle dawn a ni, a ti a. Champhai district mipuite Faina hapta hlawhtling tak hmang turin duhsakna a hlan a ni.

He hun kaihruaitu District Bawrhsap Pi Maria C.T Zuali chuan Faina hapta chu a hun chhung atan chauh nilo, tawpsan mai lova kalpui zel angaih thu a sawi a. Naupan lai atanga fai  inzirtir tan angaih thu sawiin, kalkhawmte chu faina nunpuia midangte entawntlak nih tum turin a chah a. Faina kawnga hmalakna chu midangte kutah dah mai lo tura mipuite chahin, mahni theuh atanga intan faina nei thei turin mitinte kan pawimawh dan a inchen vek a ni, a ti a. Champhai district chu theihna sang tak nei anih thu pawh sawiin, kan tum phawt chuan district fai leh entawntlak ber kan ni thei a ni, a ti bawk.

Pu Vanlalchhuanliana, DUDO Champhai pawhin thusawiin, Faina hapta chhungin fai inelna Veng, Pisa, Damdawiin, Hotel, Restaurant, Zirna In leh hmunhma dangahte tehfung hrang hrang hmangin endik tura ruat te'n endik hna an kalpui dawn thu a sawi a. Faina mai bakah ODF,  bawlhhlawh sawngbawl dante leh  faina kawnga hmalaknaah mipui tam zawk an tel theihna tura hmalak chu ngaihpawimawh zual bik anih thu a sawi a. Fai inelna chu district mai nilo State leh ram pum anga neih thin anih thu sawiin, district 11 inel tur zingah Champhai a tel avangin mipuite theihtawp chhuaha tan la turin a sawm nghal a ni.

Vawiin Faina hapta hawnna hun hi Pu Lalnunfela Chawngthu, SDO Sadar chuan lawmthu sawiin a khar a, hemi hnu hian Champhai North bialtu MLA Dr.Z.R. Thiamsanga leh District Official-te chu hmun thumah inthenin faina hnatlang leh fai kawnga inzirtirna veng leh khaw hrang hrangah kalchilhin an neihpui a ni. Dr. Z.R. Thiamsanga leh Bawrhsap Pi Maria C.T Zuali kaihhruai te'n Champhai North Assembly Constituency Model Village Ngur  leh Vaparah fai hnatlang leh fai kawnga inzirtirna an neia, bialtu MLA chuan Ngur  Model Village Health Sub Centre chu tihchangtluna B.Sc Nursing dah tum anih thu leh Middle School sakthat thuai tum anih thu a sawi. SP Pu Rex Zarzoliana Vanchhawng kaihhruaiin Kanan Vengah fai hnatlang neih niin, Addl DC Pu R.Lalnghakliana hovin Bethel Vengah fai hnatlang neih a ni bawk. Heng bakah hian Veng leh khaw hrang hrangah VC te kaihhruaina hnuaiah fai hnatlang neih a ni.