No.2762/2021-2022
Aizawl, the 28th October, 2021: Vawiin chawhma khan District Water & Sanitation Mission Committee, District Sanitation Task Force leh Jal Shakti Abhiyan- Catch the Rain Campaign Expert Team-te chuan Champhai DC Conference Hall-ah Bawrhsap Pi Maria C.T Zuali hovin Joint Meeting an nei a, he hunah hian faina, plastic hman khap, tuihna humhalh leh ruahtui khawlkhawm kawnga hmalakna leh hmachhawp hrang hrangte sawiho a ni.

He hun kaihruaitu Pi Maria C.T Zuali chuan fai tura tui pawimawhna leh tuihna humhalh sauh sauh a tul thu sawiin, nitin khawsakna kawnga tangkai tak tui tel lovin nunphung a buai a, sik leh sa inthlak, ramngaw chereu leh leihnuai tui awm kiam zel avangin tui a harsa tulh tulh a, nakin lawka harsatna lian zawk kan tawh loh nan theihtawp chhuaha hmalak a ngai a ni, a ti a. Plastic leh chemical hman nasat avanga tui bawlhhlawh zel leh tui thianghlimloin nghawng a neih theih dante tarlangin, plastic hman khap, ramngaw chereu zel tur ven leh leihnuaia tui awm kiam zel veng turin chak zawka tanlak a ngaih thu a sawi bawk. Bawrhsap chuan District mipuite chu faina kawnga tan la deuh deuh turte, plastic leh chemical hman leh sawngbawl danahte fimkhur turin a chah a. Mihring inzirtirna leh varpawhna tak tak siam chu hmasawnna ropui tak a nih thu sawiin, Official-te chu mipuite tana rawngbawl an ni tih inhria a, an tana thahnemngai taka thawk tur leh awm hmuna awm mai lova pan chilh hreh lo turin a fuih a ni.

Meeting-ah hian District Water & Sanitation Mission Committee hnuaia Open Defecation Free (ODF) Plus Verification Team, RD Block pakhat zela member 4 awmna tur din dan tur sawiho a ni a, kar thar atangin endikna kalpui nghal nise tih a ni a. ODF Plus ni thei tura 2021-2022 Financial year 2nd quarter chhunga hmalakna Champhai RD Block atanga khua/veng 7 (Chhungte, Champhai Jail Veng, Lungphunlian, Murlen, N.Diltlang, Ruantlang Mualveng, Tuipui) leh Khawbung RD Block huamchhunga khaw 5 (Buang, Leithum, Sazep, Vanzau, Zawngtetui) ten ODF Plus dinhmun an pha em tih ODF Plus Verification Team ten an endik dawn a. Heng bakah hian khaw dangahte pawh a tahtawl zela hmalak tum a ni.

District Sanitation Task Force kaihhnawih Plastic Waste Management Amendment Rules 2021 awmzia leh a tumte ngaihthlak a ni a. Vawi khat chauh hman tlak polythene plastic bag hman thin bansana, bag tawih thei Non Woven Bag leh a dang hriselna leh leilung tana him zawkte Champhai District-ah hman a nih theih nana hmachhawpte pawh sawiho a ni a. Mipuiah zau zawka zirtirnate pek a nih theih nan MHIP in theihtawp chhuahin Branch tinte kaltlangin hma lo la se tih a nih bakah, Environment Forest & Climate Change Department-in polythene plastic bag hman avanga nghawng thalo hrang hrangte leh hmang tlem tura inzirtirna pamphlet siam se, Bazar ni bikahte Official te’n Bazar-te fangkualin endikna kalpui se, a tul angin dan zawmlote mana hremna lekkawh thin nise tih a ni bawk.

Heng bakah hian Jal Shakti Abhiyan - Catch the Rain Campaign kaltlangin ruahtui tla khawlkhawm leh tui hna humhalh kawnga tanlak a tul zia ngaihthlak a ni a, ramngaw leh lui humhalh kawnga hmalak dan tur hrang hrangte sawiho niin, chanvo leh mawhphurhnate ruata siam fel a ni. A nih dang ang tura hna thawh a nih theih nan inrawntawna thawhho zel a tul thu pawh tarlan a ni bawk.

Vawiin Joint Meeting-ah hian District Water & Sanitation Mission Committee, District Sanitation Task Force leh Jal Shakti Abhiyan- Catch the Rain Expert Team member-te an tel a ni.