3235/2022-2023
Champhai, the 13th January, 2023: Summary Revision of Photo Electoral Roll, 2023 neih zawh tak hmanga Electoral Roll thar ber, Final Electoral Roll 2023 buatsaih chu vawiin chawhma dar 11:00 khan Champhai DC Conference Hall-ah District Election Officer Pu James Lalrinchhana, District Bawrhsap chuan a tlangzarh. Tlangzarh hnu hian Political Party aiawhte hnenah Final Electoral Roll Copy khat theuh a hlan nghal a ni.

District Election Officer Pu James Lalrinchhana chuan Electoral Roll tlangzarhna hun hriatpui tura kalkhawmte lawmna thu sawiin, Electoral Roll thar ber a hun taka peihfel a ni chu lawmawm a tih thu a sawi a. Mizoram pum ang pawha Electoral Roll buatsaih kawnga thawk tha leh hmahruaitute zinga Champhai District a awm chu chhuanawm a tih thu sawiin, tha thawhtute fakawm a ti a. Political party leh khawtlang hruaituten Electoral Roll buatsaih kawnga Election Official-te an tawiawm thin avangin lawmthu a sawi a. Continuous updation kalpui thin bakah Quarterly updation a tih theih zel dawn thu sawiin, 2023 MLA inthlan hmain siam that leh tih belh ngaite dan angin a hun ang thlapah tihfel zel anih dawn thu a sawi bawk a. Electoral Roll-a chuang thei turte an chuang vek theih nana tha thlah lova hmalakpui tur leh, inthlanna thianghlim leh felfai tak neih anih theih nana tanrual puiah kalkhawmte a sawm nghal bawk a ni.

He hunah hian Pu H. Lalhruaitluanga, Election Officer chuan Electoral Roll tlangzarh tak dinhmun tlangpui a tarlang a. Roll Hearing neihnaah District Research Office (DRO) nena tangkawpin Birth Certificate lem man chhuah nual anih thu a sawi a. A hun taka Electoral Roll thar ber peihfel a nih theihna tura ERO, AERO, DRO, Election Office Staff leh BLO zawng zawngte thahnemngaihna chu fakawm a tih thu sawiin, anmahni tawiawma lo pui thintu NGO, khawtlang hruaitu leh Political party aiawhte chungah lawmthu a sawi bawk.

Special Summary Revision of Photo Electoral Roll 2023 kaltlanga buatsaih Final Electoral Roll 2023 tlangzarh takin a tarlan danin Champhai District chhunga Assembly Constituency 3; 23-Champhai North AC, 24-Champhai South A/C leh 25-East Tuipui A/C chhungah vote nei mi 56,362 (mipa 27,529 leh hmeichhia 28,833) an awm mek a, mipa voter aiin hmeichhe voter 1,304 in an tam zawk a ni. Kum bithliah bikah kum 20-29 inkarah vote nei 16,051 awmin an tam bera, kum 80 chung lam vote nei mi 748 an awm bawk.

Form 6 kaltlangin Electoral Roll-a ziahluh thar mi 1,710 (mipa 889 leh hmeichhia 821) an awm a. Form 7 kaltlangin chhan hrang hrang vangin Roll-a chuang tawh mi 1,262 (mitthi- 570, hmun danga insawn 680 leh Roll-a chuang nawn 12) te paih an ni bawk.

Assembly Constituency zingah 24-Champhai South A/C a chhungkaw 6,658 awmah vote nei mi 20,804 (mipa 9,961 leh hmeichhia 10,843) awmin an tam ber a, 23-Champhai North A/C in dawtin chhungkaw 5,958 awmah vote nei mi 19,849 (mipa 9,639 leh hmeichhia 10,210) awmin an dawt a, 25- East Tuipui A/C-a chhungkaw 4,974 awmah voter 15,709 (mipa 7,929 leh hmeichhia 7,780) awmin vote nei awm tlemna ber a ni. Champhai North A/C leh Champhai South A/C ahte mipa voter aiin hmeichhe voter an awm tam zawk a ni.

Electoral Draft Roll, 2023 November ni 9, 2022 a tlangzarh taka vote awm 55,301 atangin Final Roll-ah vote nei thar mi 1,061 an awm belh a, a punna hi za zela 1.92 (1.92%) a ni. 24-Champhai South A/C ah vote punna hi sang berin za zela 2.54 (2.54%) a ni a, 23-Champhai North A/C in dawtin za zela 1.63 (1.63%) in a pung a, 25-East Tuipui A/C ah vote punna tlem berin za zela 1.47 (1.47%) in a pung a ni.

Champhai District chhunga Assembly Constituency 3 ah Polling Station 84 a awm mek a; 24/12- Champhai Vengthar Polling Station (Champhai South AC) ah vote nei mi 1,320 awmin vote nei tamna ber Polling Station a ni a, 23/21-Keifangtlang Polling Station-ah vote nei mi 85 awmin Polling Station vote awm tlemna ber a ni.