216/2022-2023
Dated Champhai, the 21st April, 2022: Vawiin khan Directorate of School Education buatsaihin District Education Centre, Champhaiah Primary, Middle leh High School Zirtirtute tan Fit India, Physical Education leh Zonal Sports chungchang inhrilhfiahna neih a ni a. He hun hi Champhai DC Pu James Lalrinchhana chuan khuallian niin a hmanpui.

He hun Pu H.Sanglura, Physical Education Officer (PEO) kaihhruaiah hian District Bawrhsap Pu James Lalrinchhana chuan thusawiin, zirtirtu hna chu ram leh Pathian rawngbawlna a nih avangin mawhphurhna a sang hle a ni, a ti a. Naupangte hnena ngaihhlut tur an zirtir chu kum 15-20 hnuahte a lang chhuah chauh thin avangin, zirtirtu hna chu dawhthei tak leh inpekna nena tih takzeta tanlak ngaihna a nih thu a sawi.

Fit India Movement kalpui mekin a tum bulpui ber chu taksa, rilru leh thlarau hriselnate kalkawp vekin kan nitin nuna behtir a ni, a ti a. Mipui, chhungkua leh khawtlang hrisel nei tur chuan rilru sukthlek a dik zawnga thlak danglam phawt a ngai a. Zirlaiteah he thanharhna thar hi kan tuh ngheh dawn chuan zirtirtuten kan rilru kan thlak hmasak a ngai a ni, a ti a. Taksa, rilru leh ngaihtuahna hrisel chuan mahni inrintawkna, chakna leh huaisenna a kengtel a, chu chu taimakna, tumruhna leh chhelna hmanga hlawh chhuah thin a ni, a ti bawk.

He hunah hian District Education Officer (DEO) Pu T.T Laltanpuia pawhin thu sawiin, Fit India Movement atan hian School tinah coordinator pakhat theuh dah niin, ram hrisela Mizoram siam chu an kutah thui tak a innghat dawn tih a sawi a. Kalkhawmte chu Fit India thil tumte thehdarh a, naupangteah a rah chhuah an hmuh ngei theihna atan tan la turin a chah a ni.

Inzirtirna hi chawhma lamah Primary leh Middle School Zirtirtute tan neih a ni a, chawhnu lamah High School Zirtirtute tan chhunzawm a ni a. Directorate atangin School Level-a Fit India kalpui dan turte leh Zonal Sports chungchangte inhrilhfiahna hun hman a ni. Vawiina hun hman hma hian Farkawnah he inhrilhfiahna hi hman a lo ni tawh bawk.