4047/2022-2023

Champhai, the 30th March, 2023: Vawiin khan District Horticulture Officer, Champhai buatsaihin FOCUS 2021-2022 (2nd Installment) hnuaia Area Expansion of Grape Cultivation' atana hmalakna kal zelah hemi hnuaia Grape chingtu beneficiary-te hnenah thlai enkawlna hmanrua sem leh zirtirna hun hman a ni. He hun hi District Bawrhsap Pu James Lalrinchhana, Chairman, District Level FOCUS Committee chuan khuallian niin a hmanpui a, Grape chingtute hnenah Grape enkawlna hmanraw chi hrang hrang a sem chhuak a ni.

He hun District Horticulture Office, New Champhaia neihah Khuallian Pu James Lalrinchhana chuan Champhaia grape chingtuten an thlaite enkawlna tur leh tharchhuah tam theih nana hmanraw chi hrang hrang an dawng chu lawmawm a tih thu sawiin, grape chingtute chu thlai chinna tur lei tih that hmasak ngai pawimawh turin a chah a. Thiamna leh finna chu suma lei theih a nih loh thu sawiin, grape chingtute chu training chhawr tangkai tur leh hlawhtlinna chang thei tura theihtawp chhuah turin a chah a. Thlai chinte leh ran inkara buaina awm thin chu pawi a tih thu sawi bawkin, hetiang thil a thlen chhunzawm zel loh nan a tul anga hmalak tum a nih thu a sawi bawk a ni.

District Bawrhsap chuan Champhai District tana hmasawnna tur hrang hrangte tarlangin, kawngpui tha tak siam chuan hmasawnna a thlen dawn thu leh, zin veivah, thlai thar hralh leh pawimawh dangahte mipuite tan malsawmna a thlen ngei a beisei thu a sawi a. Champhai District-a pipu sulhnu leh hmun mawi tak takte chu midangte hip thei tura enkawl uluk a ngaih thu pawh sawiin, hengte atang hian sum tam tak kan lalut thei a ni, a ti a. Grape hmanga thil siam chhuahte chu Champhai District hmasawnna pawimawh tak a nih avangin hmalam pan zel tur leh taima taka thawk zel turin grape chingtute a chah bawk a ni.

District Horticulture Officer, Champhai buatsaih FOCUS 2021-2022 (2nd installment) hnuaia Grape chingtu beneficiary 74 te hnenah hian thirzai, plastic crate, sprayer, vitamin leh rannung thahna hlo te sem chhuah a ni.

He hunah hian Pi H.Lalhmachhuani, Sr. HD chuan Grape venna damdawi hmandan chungchang kalkhawmte hnenah a sawi a. Pu Rolungmuana, DHC in thlai vitamin hmandan sawi bawkin, Pi Lalrinmawii, Technical Officer, Horticulture, FOCUS Champhai chuan Grape enkawl kawnga hmasawnna tur leh pawimawh hrang hrangte a sawi bawk a ni.

Grape chingtu beneficiary-te hnena thlai enkawlna hmanrua sem leh zirtirna hun hi Pu B.Lalzarzova, DHO Champhai chuan a kaihruai a, T. Upa Lalmalsawma Sailo chuan hunserh a hmang a. Pu H.S. Vanlalfakzuala, Chairman, Champhai Grape Growers Society chuan lawmthu sawiin hun hman a khar a ni.