3928/2024-2025

Champhai, 23rd January 2025: Vawiin khan FOCUS DMU Champhai buatsaihin DC Conference Hall, Keifangtlangah District Level Stakeholder’s Consultation (DLSC) Exit Strategy Meeting neih a ni a. FOCUS Project hi January ni 31, 2025 a tawp tur anih angin, loneitute hnenah FOCUS project kaltlanga hmasawnna ruhrel din hrang hrang te hlan a ni.

He hun hi Champhai Bawrhsap Pu VL Remliana, District Level Coordination Committee Chairman ni bawk chuan a kaihruai a. FOCUS Project chu beisei phak baka hlawhtling nia a hriat thu sawiin, a hlawhtlinna tura thawktute - a bik takin Farmer Interest Group (FIG) te chungah lawmthu a sawi a. Pu VL Remliana chuan hlawhtlinna chu mahni koah ṭheuh a innghat a ni tiin, kalkhawmte chu rinawmna, taimakna leh tumruhna nen a hna thawk zel turin a fuih a ni.

Pi Rosy Lalmuansangi Hmar, Jt. Director (LRS&WC) pawhin thu sawiin FOCUS Project hnuaia hmasawnna ruhrel an din hrang hrang te chu neitu thinlung pu chunga lo enkawl zui zel turin kuthnathawktute chu a chah a. Mizoram pum huap tur hmalakna thar PROSPER kalpui leh theih an inbeisei thu a sawi bawk.

Pu F. Lalmalsawma, District Agriculture Officer, FOCUS District Project Manager ni bawk chuan FOCUS kalpui anih chhunga Champhai District-a an hmalaknate a tarlang a. FOCUS hi Champhai District chhunga khaw 60 ah kalpui niin, staff 43 an awm a, Farmer Interest Group 586 hnuaiah kuthnathawktu 10382 an inziaklut a ni. FOCUS hnuaiah hian Line Department pali - Agriculture, Horticulture, Soil leh Vety te an awm a. An hmalakna langsar zingah thlai chi sem te; vawk, ar leh kel note sem te, Boar Semen Station din te, tui dahkhawlna siam te, lei luang ral tur venna - check dam siam te a tel a ni. FOCUS hnuaiah hian Integrated Farming System chu hlawhtling takin Chhungte, Hmunhmelṭha leh Samthangah te kalpui a ni bawk a ni.

Vawiin meeting-ah hian khaw hrang hranga loneitu intelkhawm Farmers Interest Group (FIG) te hnenah FOCUS hmanga hmasawnna ruhrel din hlan a ni a. An hlan zingah hian check dam, water tank, agriculture link road, horticulture link road, farm link road, water harvesting structure leh a dangte a tel a ni.

He hunah hian FOCUS hnuaia Line Department aiawh te bakah Farmer Interest Group hrang hrang aiawh te an tel a ni.