3139/2022-2023 

Champhai, the 23rd December, 2022: December ni 19 atanga ni 25, 2022 chhunga 'Prashasan Gaon ki Aur' tih thupui hmanga hman, Good Governance Week: Sushasan Saptah 2022 pualin vawiin chawhma dar 11 khan Champhai DC Conference Hall-ah Sawrkar Department kaltlanga hmalaknate zirhona, Good Governance Week Workshop buatsaih a ni a. He hun hi District Bawrhsap Pu James Lalrinchhana chuan khuallian niin a hmanpui a ni.

Khuallian Pu James Lalrinchhana chuan Good Governance Week leh Day hman anih chhan leh kalpui anih dan tlangpuite a tarlang a. Sawrkar kalphung leh inrelbawlna tha Good Governance siam turin resource neih ang angte hmang tangkaiin mipuite hmakhua ngai chung zela dan hnuaia hmasawnna thlen a tul thu sawiin, heng zingah hian mipui tel theihna, lungrual taka thil tih hona, mawhphurhna dik taka hlen chhuahna, langtlang inrelbawlna, mamawh leh zawhna neih inchhan sakna, intluktlanna, awlsam leh zangkhai zawka hna kalpuina, thuneihna semzai, police reform leh pawimawh dang tam takte a awm a ni, a ti a. Heng bakah hian hmasawnna dal theitu hrang hrangte tarlangin, do tlan a tul takzet thu a sawi bawk. 

Bawrhsap chuan Good Governance kaltlangin hmasawnna leh kalphung thar tam tak hmuh tur a awm thu pawh tarlangin, Sawrkar tha leh langtlang, mipui zalenna, huaisen taka Sawrkar hnathawk te'n mipui rawng an bawl theihna boruak tha vawngnun zel kawnga tanla turin Department thawktute a ngen a. Kalkhawmte chu mahni Office-ah theuh Good Governance kalpui tura chahin, an rawngbawl sak mipuite hmakhua ngaia hleibik nei lova theihtawp chhuah theuh turin a fuih a. Good Governance puala hun hman chuan Sawrkar hnathawkteah rilru thar a put tir ngei a beisei thu a sawi bawk.

He hunah hian Pu H.Lalhruaitluanga, SDO Sadar chuan kalkhawmte lawmna thu a sawi a. Pu ZD Dengthuama, EE, PHED Champhai, Dr. R.Lianmawia, CMO Champhai leh Pu C.C Sakhawliana, DCSO Champhaite hnen ațangin khua leh tuite tana Sawrkar tha siam kawnga Department kaltlanga mipuite hmakhua ngaia hmalakna hrang hrangte ngaihthlak a ni a. Zawhna leh chhanna hunte hmanho niin, Pi Esther Leihang, SDC in lawmthu sawiin hun hman a khar a ni.

Vawiin Good Governance Week 2022 pual Workshop buatsaihah hian Champhai khawpui chhunga Sawrkar Department hrang hrang hotute leh DC Office Staff-te an tel a ni.