No.1918/2020-2021

Dated Champhai, the 11th June, 2020: Mizoram hmun dangte rualin vawiin khan Champhai hmun hrang hrangah ‘Tun hi Thingphun hun chu a ni’ tih thupui hmangin Green Mizoram Day vawi 22-na puala thing phun a ni.

Tunlai hripui leng mek Covid-19 avangin kum dang anga programme lian buatsaih theih a ni lo a. Official function nei hran lovin Environment Forest & Climate Change department kaihhruainain Sub-Hqtrs YMA ram Mualbuhvum, Zote Road-ah sawrkar inkaihhruainate ngaipawimawh chunga thingphun hnatlang neih a ni a. Mualbuhvumah hian Forest department bakah hian Agriculture Department, Excise & Narcotics Department leh Champhai Nature Conservancy (CNC) te an hnatlanga, vawiin thingphun hnatlangah hian mi 63 vel an thawkchhuak a ni. Nikum lama Planting Agency hrang hrang 25 leh Sub-Hqtrs YMA te’n Tlaizawng tiak 428 an phun hmunhmate tihfai leh hung that mai bakah a thi leh bi ruak hnawhkhah nan Tlaizawng tiak 90 phun a ni a. DFO Office Complex-ah thingtiak 150 phun a lo ni tawh bawk.

Vawiin Green Mizoram Day puala thingphun hnatlang Mualbuhvum hmuna neihah hian Pu Lalduhthlana DFO, Pu George Lalthanngura DAO, Pu B.Zoliana, Assistant Commissioner of Exicse & Narcotics, Pu Thanliana Hauhnar ACF, Pi C.Lalrammawii, President, Champhai Nature Conservancy leh an thawhpuite an tel a ni.

Green Mizoram Day Pualin Champhai Police-te chuan SP Office chhehvel leh SP Quarters Zamadar tlangahte Champhai SP Pu Rex Zarzoliana hovin thing phun hnatlang an nei a. Pu Rex Zarzoliana chuan Green Mizoram a hlawhtlin theihna atan leh thingphunte a puitling zel theihna tura tha thawhtu tur ber leh thing leh mau suata, nungcha tihlum thinte mantu tur chu Police-te an nih thu leh Dan bawhchhiate mantu tur Police te'n ramsa suatna hmanrua an lo kawl a nih chuan enliam mai mai an nih loh tur thu a sawi a. Green Mizoram Day an hman chuan nungcha, thing leh maute humhalh a tulna kawngah mitinte ti thangharhtu nise a a duh thu a sawi bawk.

Vawiin vek khan Champhai District Hospital-ah District Medical Superintendent (DMS) Dr.
Zatluanga hovin Green Mizoram Day pual hian thing phun hnatlang neih a ni a. DMS chuan District Hospitala thawktute bakah Green Mizoram Day puala thingphun duh tan Hospital Compound-ah thing phunna tur ruahman anih thu leh thing phun tura in-report te hnenah thingtiak pe chhuakin inkharkhipna zawm chungin thingte hi phun anih thu an sawi a ni.

Heng bakah hian Sawrkar department hrang hrang 18, Zotlang VC, Ngur VC, Champhai Nature Conservancy leh mimal te’n Environment Forest & Climate Change department atanga thing tiak engemawzah lain an mahni remchan dan angin an ram leh in bulahte thing tiak an phun bawk a. Green Mizoram Day 2020 pual hian Environment Forest & Climate Change Department Champhai chuan vawiin thleng khan thingtiak 2590 an sem chhuak tawh a, sem leh phun tawh zawng zawng zat hi 2680 a tling tawh a ni. Thing tiak sem chhuahte hi chi 16; Tlaizawng, Jacaranda, Khuangthli, April, Chawmzil, Herhse, Ngiau, Sasua, Chawnpui, Makpazangkang, Keifang, Chhawkhlei,Ngaingaw, Theitat, Hlingsi leh Theihai tiak te an ni. Green Mizoram Day hi kum 1999 atanga hman a ni.