No.806/2021-2022

Dated Champhai, the 3rd June, 2021: Vawiin khan District Level Committee on Green Mizoram, Champhai District chu an Chairman Pi Maria C.T Zuali, District Bawrhsap hovin June ni 11, 2021 a Green Mizoram Day (GMD) hman dan tur ngaihtuahin DFO Pisa-ah an thukhawm.

He hun kaihruaitu Pi Maria C.T Zuali chuan Mizoram mawi nante, tuihna tam zawk kan neih theih nan leh boruak thianghlim kan neih theih nan thing phun uar a tul thu leh, a awmsate tichereu lova humhalh tlat a tul thu a sawi a ni.

Thukhawm chuan Green Mizoram Day-2021 hawnna inkhawm chu June ni 11, 2021 chawhma dar 11 ah New Champhaiah neih nise a ti a. He mi ni hian thing phun bakah, Hringlangtlang ngaw hnuai thawlh fai/sam fai hnatlang leh, Hringlangtlang District Park-ah ramsa leh sava tlan chi thing par leh rah chi phun hnatlang neih nise a ti a. Heng bakah hian New Champhai-Zokhawthar kawngpui Ruantlang leh Melbuk inkar kawngkam tihfai leh thing phun hnatlang neih leh, nikum hmasa leh nikum lama Green Mizoram Day-a thing phunna hmun Mualbuhvumah live hedge fencing ti tura hmalak nise tih a ni.

Green Mizoram Day (GMD) hawnna inkhawmah hian Champhai District chhunga khua, kangmei ven kawnga hma la tha 3 te leh Champhai District-a nitin chanchinbu chhuak, kangmei ven chungchanga mipui zirtirna pe tha 3 te lawmman pek ni se tih a ni bawk.

District Level Committee on Green Mizoram-a member ni mekte chu kum 2009 daih tawha Sawrkarin a ruat an nih avangin tun dinhmunah siam that ngai ni a ngaih tawh avangin member turte rawtna siam ani a, pawmpui turin sawrkarah thlen nise tih a ni.

Thing phun chungchangah hetiang hian hma la turte ruat an ni; District Park Area-ah District Park Management Committee Member-te leh Mualkawi Branch YMA, New Champhai-Zotlang kawngpui sira thing phun chungchangah Champhai Nature Conservancy (CNC) te, Ruantlang leh Melbuk inkar kawngpui sira thing phun turin DFO kaihhruaina hnuaiah YMA Branch-te leh Sawrkar Department hrang hrang atanga thawk chhuakte, Mualbuhvumah Sub Hqrs. YMA Champhai hnuaia Science & Environment Sub-Committee-te ruat an ni.