708/2025-2026

Champhai, dated 2nd June 2025: Vawiin khan District Level Committee on Green Mizoram Champhai District chu Addl. DC Pu K. Zorammuana hovin DC Conference Hall, Keifangtlangah kumin June ni 11 Green Mizoram Day 2025 hman dan tur relin an thukhawm.

Chairman Pu K. Zorammuana chuan kum tin Green Mizoram Day pualin Champhaiah hlawhtling taka hun hman a nih  thin thu sawiin, thingphun mai duh tawk lova a enkawl zui kawngah tan lak a tul hle tih a sawi a. Mipuiten Green Mizoram Day puala thingphun theuh turin a sawm bawk a ni.

Pu Lalbiakchama Chawngthu, DFO, Champhai Forest Division chuan agenda sawifiahna leh nikum Green Mizoram Day 2024 hman dan tarlangin nikum aia hlawhtling zawka hman a nih theih nan ngunthluk zawka ngaihtuahna sengturin member te a sawm a ni.

Thukhawm chuan kumin Green Mizoram Day hawnna hun chu June ni 11, Nilaini  chawhma dar 11:00-ah CF Auditorium (Forest Office) Bethel Veng, Champhaiah hman nise tiin a rel a. He ni puala thingphun hnatlang neihna hmun atan Mualbuhvum atanga Zote, Khankawn atanga Zotlang, Ruantlang atanga Mualkawi, Mualkawi atanga Melbuk leh Melbuk atanga Zokhawthar te thlan a ni a, heng hmunahte hian thingtiak 1520 dawn phun tura ruahmanna siam niin remchan dan azirin nikum lama thingphun thawm that ngai te thawmthat nise tiin a rel bawk.

Vawiin thukhawm chuan kumin Green Mizoram Day-ah hian kangmei ven kawnga hma la tha khuate hnenah lawmman sem chhuah a nise tiin a rel bawk a ni.