No.213/2021-2022

Dated Champhai, the 21st April, 2021:  Inthlan kaihhnawih inhrilhhriatna leh felfai taka vote thlak a nih theihna tura hmalakna Systematic Voters’ Education & Electoral Participation (SVEEP) kaltlangin vawiin khan High School zirlaite tan District Election Office, Champhai District chuan SVEEP Quiz Competition I&PR Auditorium CHANEM-ah a buatsaih. He hun hi District Election Officer Pi Maria C.T Zuali, Deputy Commissioner ni bawk chuan hmanpuiin, SVEEP Quiz Competition hi a hawng a ni. 

District Election Officer Pi Maria C.T Zuali chuan High School zirlaite tana election chanchin leh hriatna tipung thei tur Quiz Competition buatsaih a ni chu lawmawm a tih thu a sawi a. Vote nei thar te’n mipui sawrkar democracy siam kawngah duhthlanna zau tak an neih thu leh mahni chhia leh tha hriatna hmang ngeia an duhthlanna an kaltlangpui a pawimawh hle a ni, a ti a. Duh thlang thei tura thangtharte chakna pek leh thianghlim leh felfai taka vote an thlak thiam theihna kawnga  zirtirna pek a tul thu sawiin, nakin lawka khawtlang nu leh pa ni tur an nih avangin ram hruaitu thlan kawngah fimkhur tur leh ram hruaitu tura duhawm leh felte chauh thlang chhuak thiam thei tura ngaihtuahna seng turin a chah a. An hlawkpui tur SVEEP Quiz Competition buatsaih chu harhtharna hmahruaitu atana hmang tura duhsakna hlanin a hawng a ni. 

SVEEP Quiz Competition khuhhawnna program tawi neih hi Election Officer Pu Lalnunfela Chawngthu chuan kaihruaiin, Quiz kaltlangin inelna mai piah lamah mipui leh zirlaiteah inthlan chungchang leh thiamna dangte tuh tuma ngaihtuahna sen a nih thu a sawi a. Quiz kalpui dan tur chungchang leh inkaihhruaina hrang hrangte a sawifiah nghal bawk. 

He inelna huangah hian Champhai District chhunga High School 10 - Govt. GM High School, Govt. R.Hranga High School, Venglai Secondary School, Bethel High School, Holy Cross High School, PES Zotlang, BC English Academy, Bethel Mission School, King Solomon's School leh Holy Mission School-te telin, School pakhat atangin mi pahnih zel an chhuak a ni. Quiz Master Nl. Zosiamkimi Tlau kaihhruaina hnuaiah  vawiin khan First round (Mizoram leh India ram election chungchang leh Indian Polity) leh Second round (Current Affairs leh General Knowledge) te zawh fel niin, point hmu sang 4 - Venglai Secondary School, Holy Cross High School, Bethel Mission School leh Holy Mission School-ten final an lut a. Zirtawpni April Ni 23, 2021 chawhma dar 11 hian a hmun ngaiah Final  round neiha hmawr  bawk tum a ni. 

Pakhatna hian Rs.10,000/- leh Citation, pahnihnain Rs. 7,000/- leh Citation, pathumnain Rs. 5,000/- leh Citation, palinain Rs. 3,500/-   an dawn dawn bakah a tel dang zawng  zawng ten participation prize Rs. 2,000/- theuh an dawng dawn a ni.