1245/2022-2023
Champhai, the 14th July, 2022: Vawiin khan Champhai District Bawrhsap Pu James Lalrinchhana hovin Champhai District-a hman khat daih polythene/plastic-Single Use Plastic (SUP) hman thin tihrem a nih theih nana hmalak dan tur chungchang rela thutkhawm a ni.

Bawrhsap Pu James Lalrinchhana chuan hman khat daih polythene leh plastic dangte hman tihtawp tuma hmalak chhoh mek zel a nih thu sawiin, vawilehkhata tihhlawhtlin nghal mai a harsat pawhin a tahtawlin inzirtirna leh inhrilhhriatna mumal tak nei chunga hmalak a tul a ni, a ti a. Department pahnih khat chunga mawhphurhna kan dah chuan a hlawhtling ngai dawn lova, kan zavaiin kan tan tlan a tul hle a ni, a ti bawk.

He hunah hian hman khat daih polythene/plastic tihrem a nih theih nana hmalak dan tur hrang hrangte zau taka sawiho a ni a. Sawrkar Pisa zawng zawng, Zirna in, Damdawiin, Clinic, Sports hmunhma leh mipui punkhawmna hmunahte Single Use Plastic hmang lo tura ngenna siam ni se tih a ni a. Dawr, Bazar, Catering leh hmun dang danga hman khat daih polythene leh plastic hman thin chu inzirtirna leh inkawhhmuhna mumal tak siama hrilhhriat ni se, digital flyer siama thehdarh nise tih a ni bawk a. Department tinah Single Use Plastic Enforcement Squad din leh a tul anga endikna kalpui thin ni se tih a ni bawk.

He hunah hian Single Use Plastic hman tihtawp tuma inzirtirna banner, poster leh ngenna lehkhate tihchhuah tawh thin a nih thu DUDO hnen atangin ngaihthlak a ni a. Hmalakna hmasa atan mipui nawlpui, single use plastic hmang nasa dawrkai leh thil zuarte hnenah inzirtirna August thla tawp thlenga neih ni se tih a ni a. September ni 1, 2022 atangin khauh taka dan kenkawha, dan bawhchhiate chungah hremna lekkawh ni se tih a ni bawk.