8/2022-2023
Champhai, the 1st April, 2022: District Programme Office, Women and Child Development (WCD) Champhai leh Mizoram State Commission for Women tangkawpte chuan vawiin chawhnu dar 1 khan Kahrawt VC Hall, Champhaiah hmeichhiate chanvo leh dikna venhim kawnga dan leh hrai, zualko theihna leh pawikhawihtuin hremna a hmuh theih nana hmalak theih dan inzirtirna 'Legal Awareness Campaign', NGO, VC, Zirtirtute leh Department hnuaia thawktu hrang hrangte tan an buatsaih.

He hun hmanpuitu Pi Sylvie Z.Ralte, Addl. District & Sessions Judge, District Court Champhai chuan hmeichhiate dikna leh chanvo humhim leh pawikhawihtuin dan hnuaiah hremna a hmuh ngei theih nana inzirtirna buatsaih chhimtute chu training tha taka ngaithla a, a taka hmang tangkai thei tura rilru siam turin a fuih a. Midangte zirtir chhawgtu nih tum tur leh miharsa zawk leh puih ngai, anmahni pantute tlanchhiatsan lova puih an ngaihna zawnah phur taka pui thin turin a chah bawk a. Hetiang kawnga inzirtirna nasa zawk neih a tul thu pawh sawiin, dan hriatna avangin pawikhawihtute man chhuah leh hremna pek a awlsam phah thu a tarlang a. Hmeichhiate dikna leh chanvo humhim nana training pawimawh tak buatsaihtu leh ngaipawimawha kalkhawmte fakawm a tih thu a sawi bawk.

Addl. District & Sessions Judge hnen atang hian inchhungkhura hmeichhiate chunga hleilenna hrang hrang thleng thinte laka inhumhimna leh invenhimna dan, 'Protection of Women from Domestic Violence Act, 2005' te, hnathawhna hmuna hmeichhiate chunga mawilo taka chetna leh an zahawmna tihbawrhbanna awm thei chungchang te leh mihring hmanga sumdawnna chungchang ngaihthlak a ni a. Resource person dang Pu Lalchhuansanga Sailo, Special Public Prosecutor (POCSO) hnen atangin 'The Mizo Marriage, Divorce and Inheritance of Property Act, 2014' chungchang ngaihthlaka zirho a ni bawk.

He hun hi Pu Lalrinmuana, DPO Champhai chuan kaihruaiin kalkhawmte lawmna thu a sawi bakah Mizoram State Commission for Women Chairperson thuchah a chhiarchhuak a. Nl. Amy Lalthanzuali, DPA in hunserh a hmang a, Pi H.Zodinsangi'n lawmthu sawiin hun a khar a ni.