4049/2022-2023

Champhai, the 30th March, 2023: District Treasury Office, Champhai buatsaihin vawiin khan I&PR Auditorium, CHANEM Building, Champhaiah IFMIS kaltlanga bill leh hlawh pekchhuah tur chungchang Department Cashier leh Bill Assistant-te zirtirna pek an ni.

He hun kaihruaitu Pu Lalchhuanliana Sailo, District Treasury Officer chuan support engineer-te indaihlohna avanga duhthusama training an buatsaih theih loh avangin training kaltlanga thil zir turte uluk taka ngaithla turin kalkhawmte a chah a. Hlawh leh bill pekchhuah kawngah IFMIS kaltlanga hmalak mek a nih avang leh hman chhunzawm zel tawh tur a nih avangin Department hrang hrang aiawha kalkhawmte chu IFMIS hman thiam ngei ngei a ngaih thu a hrilh a; harsatnate an neihte an hnena thlen hreh lo turin a chah nghal bawk.

Vawiin IFMIS Training-ah hian Pu Malsawmdawnga, Support Engineer chuan Cahsier leh Bill Assistant kalkhawmte hnenah IFMIS hman dan chungchang sawifiahin, chipchiar takin zirtirna a pe a ni.

Mizoram Sawrkar hnuaia Finance Department thuchhuak angin April ni 1 atangin IFMIS (Integrated Financial Management and Information System) kaltlangin hlawh leh bill-te pekchhuah tawh tur a nih avangin he training hi buatsaih a ni a, Department thenkhat chuan IFMIS hi an hmang tan mek tawh bawk a ni.