No.1663/2021-2022

Champhai, the 2nd August, 2021: Vawiin chawhma khan District Level Independence Day Celebration Committee, Champhai District chu Addl. DC Pu Henry C.Lalrawnkima kaihhruaiin Independence Day, 2021 lawm dan tur chungchang relin DC Conference Hall-ah an thukhawm.

Thukhawm chuan India ramin zalenna a hmuh ni August ni 15 chu Covid-19 hrileng vangin kum dang anga ropui taka lawm theih ni dawn lo mahse, sawrkarin ruahmanna a duan zulzuiin a lawmna hun buatsaih ni se tiin a rel a. Champhai District chhunga lawmna pui ber tur chu DC Bungalow tualzawl, Keifangtlangah zing dar 8:00 atanga neih tan ni se, zing dar 6 ah sawrkar pisa leh quarters, zirna in leh private building-ahte hnam puanzar zar nise tih a ni a. Official leh sawm bikte chu zing dar 7:30 ah DC Bungalow thleng kim hman tura beisei niin, August Ni 14, 2021 chawhnu dar 2 ah inpuahchahna leh enchhinna hnuhnung neih nise tih a ni bawk.

Kumin Independence Day lawmnaah hian Covid-19 hrileng vangin Sikul naupang Parade Contingent leh Pipe Band-te an awm dawn lova, Mizoram Police Contingent-ten hnam puanzar chibai an buk dawn a ni. Independence Day lawmna hun hman hi mipuite thlir theih turin Local Cable TV pahnih CCN leh LCN atangtein Live Telecast hmanga tih chhuah tum a ni. District Level Independence Day Celebration Committee chuan Independence Day chu India ram ni pawimawh berte zinga mi a nih avangin official leh sawm bikte chu he hun hi ngaipawimawha tel theuh turin a sawm a ni.

Meeting-ah hian urhsun taka Independence Day lawm a nih theih nan sawrkar department hrang hrangte hna chanpual siamfel nghal niin, mahni chanvo theuhte hneh taka hlen turin Committee chuan mawhphurhna latu zawng zawngte a ngen a ni.