967/2024-2025

Champhai, 27th June 2024: International Day Against Drugs Abuse & Illicit Trafficing, 2024 chu nimin khan District Hospital Complex, Champhaiah hman ani a, thupui atan "Kan dinhmun a chiang e, invenna kawngah tan i la ang u" tih hman a ni. Bawrhsap Pu James Lalrinchhana chuan khuallian niin a hmanpui. He hunah hian Champhai Police te ruihhlo man sa cheng 30,43,81,000 a hal ral a ni.

Khuallian Pu James Lalrinchhana chuan thu sawiin, he hun hi khawvel pumah hman thin a ni, a ti a. Ruihhlo dona kawnga thawk tha tualchhung mi leh Police te chawimawi an ni chu lawmawm a tih thu a sawi a. Damdawi hmansualna hian mimal chauh a tibuai lova, chhungkua nghawngin khawtlang a kangkai a, ram hial a nghawng a, ei leh bar bakah kan hriselna thlengin nasa takin a nghawng avangin ruihhlo do rem tura a huhova tan lak zel hi mitinte tihmakmawh a ni, a ti.

Miten an lo hriatchian theihna tura beihpui thlak a, awareness campaign hi ruihhlo laka kan invenna pawimawh ber a nih avangin awareness campaign hi kan bansan thiang lo tiin kalpui zel turin a chah a, Hmun tina YMA te thawhrimna leh an inpekna ropui a tih thu a sawi a, ruihhlo man a nihin thuhretu an ngai thin a, thuhretu atana tang thin te chungah lawmthu a sawi bawk.Thalaiteah ruihhlo tihrem a nih theihna tura hmathar lak a, infiamna emaw hmanraw dang hmanga an rilru kan lak pen thiam a ngai a ni, a ti a. Pu James Lalrinchhana chuan heng ruihhlo zo te hi kan Force te leh NGO te leh khawtlang hruaituten lo man lo se chuan nasa takin thalai tam tak nun a tichhe dawn, a ti a. Vawiina ruihhlo halral tur thahnem tak awm chhan hi an thawhho tlatna vang a nih thu sawiin, tang hova thawkho zel turin a sawm a, hei hian Mizoram chauh a chhanhim dawn lova, India ram hmun hrang hrang pawh a chhanhim tel dawn a ni, a ti a. Khuallian chuan ruihhlo mana do zel anih tur thu sawiin, a tawlh thinte pawh ruihhlo tawlh bansan turin a hriattir a, tawlh lui an awm anih chuan man zel tum anih thu a tarlang bawk.

International Day Against Drugs Abuse & Illicit Trafficing, 2024 thupui atan "Kan dinhmun a chiang e, invenna kawngah tan i la ang u" tih hman a ni.

He hun hi Pu Vineet Kumar, IPS, SP Champhai chuan kaihruaiin ruihhlo tam tak an manna kawnga tha taka thawhpui thin tu NGO hrang hrang te, Department leh chanchinbumite chungah lawmthu a sawi a, hun lo kal zel turah pawh ṭawiawm zel turin a sawm a ni.

Vawiin a ruihhlo hal ral takte hi Champhai District Police ten kum 2022 November leh January ni 11, 2024 inkara hmun hrang hrang atanga ruihhlo an man khawm a ni a, heng ruihhlo halral takte hi Champhai District Police ten ND&PS Act. hnuaia thubuai an ziahluh niin case 110 ziahluh a ni a, Court trial kallai mekte an ni. Vawiin a halral takte hi Heroin Kg 25.292, cheng 7,58,76,000 man hu, Methamphetamine Kg 105.877, cheng 13, 76,40,000 man hu, Crystal Methamphetamine Kg 3.028 cheng 9,08,40,000 man hu leh Ganja Kg 5, cheng 25,000 man hu te an ni.

Ruihhlo do kawnga hnathawk tha VDP pathum - Dungtlang, Kelkang leh Ngur te hnenah chawimawina hlan a ni a, ruihhlo man kawnga thawk tha zual Case IO ah Inspector Zoramhermawia, SI Lalhmuakliana, SI C. Lalsangliana, SI Liansangpuii, SI T. Lalthianghlima, ASI Lalbiaknunga, ASI C. Hmingthantluanga, ASI Jonathan Lalbiakkima te hnenah chawimawina hlan an ni bawk.

International Day Against Drugs Abuse and Illicit Traffiking pualin hian nimin zing atang khan De-addiction Centre leh Targetted Intervention drop-in Centre, Champhai AIDS Do Pawl (CADP), Genesareth leh Metakhen te tlawh a ni bawk a ni.