842/2022-2023

Champhai, the 9th June, 2022: Vawiin chawhnu dar 3:00 khan India ram zalenna kum 75-na puala tuihna humhalh leh ruahtui khawl kawnga hmalakna, Jal Shakti Abhyan: Catch the Rain-2022 Campaign hnuaia hmalak dan tur ngaihtuahin Champhai DC Conference Hall-ah thutkhawm a ni a. He hunah hian Sawrkar laipui aiawhin Pu Vivek Kumar Sharma, Director, Ministry of Mines, Government of India, Central Nodal Officer, Jal Shakti Abhiyan leh Pu VS Ramarao, Technical Officer, Ground Water Scientist & Engineer-te an rawn tel a. District Official-te hi Bawrhsap Pu James Lalrinchhana'n a ho a ni. Jal Shakti Abhiyan: Catch the Rain-2022 Campaign hian 'Catch the Rain, Where it falls, When it falls', 'Ruahtui chu a tlakna hmun leh hun apiangah khawlkhawm zel ang che' tih thupuiah a hmang a ni.

District Bawrhsap Pu James Lalrinchhana chuan Central lam hotuten Jal Shakti Abhiyan: Catch the Rain-2022 Campaign kalpui tura tulte endika Champhai an tlawh chu lawmawm a tih thu a sawi a. India ram zalenna kum 75 tlin lawmna puala tui hnianghnar leh dahkhawlna tha nei tura Mission Amrit Sarovar duan a nih thu leh hlawhtling taka kalpui a nih theih nan line department hrang hrang inkarah inpawhtlang taka thawhho a tul thu a sawi a. Mission Amrit Sarovar hnuaiah District chhungah tuidahkhawlna Dil 75, kum 2023 August ni 15 hmaa zo hman tura tih chu theihtawp chhuaha bawhzui zel tum a nih thu tarlangin, a tam lam ai mahin a that leh tangkaipui theih lamah tanlak a tul thu a sawi a. Kan zavaia thawhhona kaltlangin Champhai District-ah he hmalakna hi hlawhtling takin kan kalpui thei a ni, a ti bawk. 

Pu Vivek Kumar Sharma, Central Nodal Officer, Jal Shakti Abhiyan chuan Champhaia an cham chhunga Official-te leh khawtlang mipuite tawiawmna tha tak an dawn avangin lawmthu a sawi a. Catch the Rain campaign, Mission Amrit Sarovar hnuaia hmalak theihna tura ruat ruahtui khawlkhawm theihna, tuihna humhalhna leh tuilakna hrang hrang thlanchuah zinga hmun 10 dawn an tlawh thu sawiin, Keilungliah lui khuah, Botanical Garden  Zotlanga hmun sang zawka tuikhawlna siam hmalakna, ramri hrula tuilakna leh khawlkhawmna siamte chu fakawm a ti a. Electric power hmang lova lei hipna hmanga tuilakna siamte leh a enkawlzui kawngah khawtlang mipuiten neitu nihna thinlung an pu chu chhuanawm a tih thu a sawi bawk a. Official-te chu a taka hna thawk tur an nih thu hrilhin, hmunhma remlo chung pawha tuidahkhawlna tha siam tura theihtawp chhuah turin a chah a. Mamawh leh harsatna an neihte an hnena thlen thin turin a chah bawk.

Thusawitu dang Pu VS Ramarao, Technical Officer, Ground Water Scientist & Engineer chuan chhungtinin ruahtui khawlkhawmna tha tak an siam chu tha a tih thu sawiin, tuidahkhawlnan tuikhur te pawh tihchangtlun vek theih a ni, a ti a. Tuihna siamtu thingphun leh ramngaw humhalh kawngah tanlak zel a tul thu pawh sawiin, mipui hnenah zirtirna zau zawk kalpui a tul thu a sawi bawk.

He hunah hian thil zir leh hmuh atanga hmasawnna leh hmalak tulte sawiho a ni a. Tuilakna leh dahkhawlna enkawl leh vil kawnga khawl changkang zawk thil record a hrilhhre zung zung thei dah ni thei se tih te, Mission Amrit Sarovar inkaihhruainate chiang zawka zira hmalak dan tur chin hun bituk siam te, hna tlo leh rotling siam a nih theih nana tanlak a tul thu te, van ruahtui tla khawl kawnga mipuite fuih thar te, mimal nilo vantlang tana intawm theih tuitlinna Dil siam te, tui harsatna hmun khuaahte hmalak bultana district level anga kalpui te, khawtlang mipuiin neitu thinlung an put theih nana inzirtirna zau zawk kalpui a tul thute tarlan a ni a. Line department-te chu hmunhma tlawh chungchang report kimchang siam tura tih an nih bakah hmalaknate thla tin Thawhtanni hmasa berah video confrencing hmanga sawiho thin ni se tihte rel a ni bawk.

Thukhawm chuan Mission Amrit Sarovar  hnuaiah Phaizau tuikhuah, Zotlang 1 leh Keilungliah lui khuahte chu thlangfelin geo-tagging tih nghal turin a pawm a. Mission Amrit Sarovar hnuaia hmalakna tura DRDA in hmun 70 a thlan fel tawh thu leh a dang 5 te pawh ngaihtuah mek a nih thute tarlan ni bawkin, hengte hi Mission Amrit Sarovar inkaihhruaina nena enmil chunga zirchian ni se tih a ni. 

Central Team hian nimin khan Champhai Zotlanga tuidahkhawlna hrang hrang leh Keilungliah lui khuahte an tlawh a. Vawiin khan Dilkawn leh Zokhawthar khuate tlawhin tuilaknate an tlawh tel bawk a ni. Er. ZD Dengthuama, EE, PHED hnen atangin tuikhuah leh tuidahkhawlna hmunhma tlawh hrang hrangte chanchin leh enkawl a nih dante ngaihthlak a ni bawk.

He hunah hian DC Office-a Officer-te, RD Department, PHE Department, Forest Department, Irrigation & Water Resources Department, Fisheries Department leh Land Resources, Soil & Water Conservation Department hotute an tel a ni.