2222/2025-2026

Champhai, dated 14th November 2025: Vawiin khan Kahrawt Field-ah Birsa Munda piancham kum 150-na, Janjatiya Gaurav Diwas lawm a ni.

He hunah hian Champhai Bawrhsap Pu Mohammed Aaquib chuan Janjatiya Gaurav Varsh Pakhwada puala intihsiakna buatsaih a tel zawng zawngte chungah lawmthu a sawi a, inbuatsaihna chep tak karah zirlai, YMA leh a huaihawttu DC Office staff te'n an chanvo hneh taka an hlen thei chu lawmawm a tih thu a sawi. Bhagwan Birsa Munda chu India rama Tribal te tana mi pawimawh tak a nih thu leh India ramin zalenna a sual laia mi pawimawh tak a nih thu tarlangin tunlai mite hian tunge a nih kan hriat thar a tul, a ti. Bawrhsap chuan tun hmaa paper-a painting competition hmachhawn thin te'n bangah a vawi khatna atana an ziak chu an tan pawh rahbi thar pawimawh tak a nih thu a sawi a, hun kal zel turah pawh hei hian zirlai naupangte ah a tha zawnga nghawng a neih ngei a beisei thu a sawi.

He hun hi Kahrawt Field-ah hman niin Pu Lalchhuanawma Ralte, SDC chuan a kaihruai a, Pu T. Lalnunsanga, Vice President SYMA chuan Indigenous Games buatsaih a nih dan a tarlang a, Pu T. Lalengzama hnen atangin Wall Painting Competition an buatsaih dan report ngaihthlak a ni bawk.

Janjatiya Gaurav Varsh Pakhwada hi November ni 1 atanga ni 15 chhung hman a ni a, vawiin khan Tribal Art Wall Painting Competition chu CHANEM Building-ah buatsaih niin Sumo Counter bul bangah lem hi ziah a ni a, Mizo Indigenous Games hi November ni 13, 2025 (Ningani zan) khan Champhai Electric Veng Community Hall-ah buatsaih a ni a, insuk nawr, inkawi bah leh arpa thai te hmangin intihsiakna neih a ni.

Indigenous Games Inkawibah ah Lalzova Group te pakhatna an ni a, Rokunga Group te pahnihna niin Awithangpa Group te pathumna an ni. Insuknawrah Pu Lalrozela chu pakhatna a ni a, Tv Lalrawngbawla chu pahnihna niin Tv Lallawmkima chu pathumna a ni. Arpa thai ah Vankhama Group chu pakhatna an ni a, Awithangpa Group te pahnihna niin Lalzova Group te pathumna an ni.

Wall Painting Competition ah hian High School 5 leh Higher Secondary School 2 atangin zirlai 15 an tel thei a, HT Malsawmtluangi, Govt. Ruantlang High School chu pakhatna a ni a, Lalthlamuanpuii, Home Mission School chu pahnihna a ni a, Lalruathlui, Govt. GM High School chu pathumna a ni. Competition-a tel zawng zawngte hnenah Consolation Prize pek vek an ni.