No.162/2021-2022

Dated Champhai, the 16th April, 2021: Vawiin khan Fire Service Week 2021 hmanna kalzelah Champhai Fire Station-a thawktute leh 2nd IR Police-te tangkawp chuan Champhai Circuit House-a thawktute chu kangmei chhuah thulha chet lak dan leh a taka tihchhinna Fire & Evacuation Drill an neihpui.

Champhai Fire station-a Station Officer Pu F.Lalchhandama chuan Circuit house a thawktute chu kangmei a chhuah thulha chet lak lak dan hrang hrangte, tih tur leh tih loh turte a hrilhfiah a. Kangmei laka fimkhur tura ngenin, kangmei chhuah thulhah Fire Station te rang taka hriattir thin turin a chah a ni.

He hunah hian Fire Extinguisher hman dante, hliam sawngbawl leh senghawi dante, chhanchhuah hna thawh dan kawng hrang hrangte a taka entirna leh zirtirna neih a ni bawk.

Kumin week hman chhung hian Champhai Fire Station-a thawktute chuan building thlan bikah Fire safety Inspection an nei a. Fire Station biakpawhna number chuanna bookmark-te semin street campaign an nei thin dawn a ni. Fire Service Week hi tun thla April Ni 20, 2021 thleng hman tur niin, thupui atan 'Kangmei chhuak thulhah kangthelhna hmanrua nena lo inrinlawk hi himna a ni', tih chu hman a ni.