No.3245/2019-2020

Tunlai hrileng mek Covid-19 laka invenlawkna atana Mizoram puma March Ni 22 atanga 29, 2020 thleng awh tur Lockdown kalpui mek chu Champhai District mipuite’n an zawm tha hle.

Nimin lamah hlawhtling taka All India Janta Curfew leh Mizoram State Lockdown-te neih anih hnuah, vawiin hian Lockdown hi neih chhunzawm a ni a, tul bik thil niloah mipui veivak hmuh tur an awm lo a, veng leh khaw hrang hrangah te dan leh thupek keng kawhtute leh NGO-te an duty tha hle a ni. Indo-Myanmar inkalpawhna hmun Zokhawthar Gate khar anih avangin Myanmar kaltlanga mihring leh bungrua a lo luh lohna turin theihtawp chhuah chhunzawm zel a ni a. Ramri depah Police Duty Post 18 leh Sub-Hqtrs YMA hnuaia Branch hrang hrang Duty Post 21 awm mekin, a tam zawkah hian remchan zawkna avangin an duty tlang bawk a, hmun engemawzatah Assam Rifles-te an duty bawk a ni. Heng baka duty ngaihna a awm anih chuan a tul ang zela vengtu in dah tum a ni bawk. Sub-Hqtrs YMA hnuaia thuthmun Branch-te a tahtawlin an in duty chhawk mai bakah, thuthmun Branch nilo te’n an mahni huamchhungah theuh ngawrh takin duty an kalpui mek zel bawk a ni.