189/2024-2025 

Champhai, the 15th April, 2024: Lok Sabha Inthlanpui, 2024 atana Vulnerable Polling Station-a duty tur Micro-Observer leh Videographer-te tan vawiin chawhnu dar 1:00 khan DC Conference Hall-ah training buatsaih a ni.

District Election Officer Pu James Lalrinchhana chuan Micro-Observer leh Videographer-te chu Observer aiawha Vulnerable Polling Station-a duty tur, ECI mit leh beng an nih thu hrilhin, an duty-na tur a pawimawh em avangin fimkhur taka hma la turin a fuih a. Training atanga hriat leh zirchhuah an neihte chu tha taka hlenchhuah theuh tum turin a chah nghal bawk.

Thusawitu dang Dy. DEO Pu K. Zorammuana chuan kalkhawmte chu an pawimawhna hre thar leh theuh turin a chah a. Observer hnena report pe tur an nih avangin inthlan kaihhnawih hriattur pawimawhte hriat zel tum tur leh hmalaknate hriatpui zel tum turin a chah bawk.

He hunah hian Pi Lalhruaitluangi, Nodal Officer, Training Management & Important Forms /BDO Champhaiin Micro-Observer leh Videographer-te tana hriattur pawimawh leh mawhphurhnate a sawifiah a. Zawhna leh chhanna hun hman a ni bawk.