2068/2026-2027

Dated Champhai, the 3rd September 2026 : Vawiin khan Mizoram Chief Electoral Officer Pi Garima Gupta hovin DC Conference Hall Keifangtlangah, SIR-a mawhphurhna hrang hrang neitu, ERO, AERO, Political party, NGO leh MJA hruaitute Champhai District-a SIR 2026 kalpui dan ennawnin an ṭhukhawm.

Champhai DC, District Election Officer ni bawk Pu Mohammad Aaquib chuan CEO lawmna thu a sawi a. SIR hmawrbawk a ni dawn ta chu thawktute inpekna vang liau liau a nih thu sawiin, CEO office-in an puihna zawng zawngah lawmthu a sawi bawk a. Champhai District chhunga SIR 2026 kalpui a nih dan te, an thlen chin te leh hmalak a nih dan hrang hrangte powerpoint presentation hmangin a tarlang bawk a ni.

CEO Pi Garima Gupta pawhin Champhai chu District hrang hrang zinga che ṭha ber pawl an ni, a ti a. Thawktu zawng zawngten Electoral Roll dik leh felfai neih a nih theihna tura phur taka an thawhhona avangin lawmthu a sawi bawk a ni.

SIR Draft Electoral Roll hi July ni 7, 2026 khan tlangzarh tawh a ni a. Draft Electoral Roll ah hian Champhai District chhungah voter 56,412 an awm a. Assembly constituency pathum awmin, Champhai South-ah voter 24,106, Champhai North-ah 19,566 leh, East Tuipuiah voter 15,440 an awm a. Champhai District chhungah hian SIR kalpui hma khan voters 58,846 an awm a, Draft Electoral Roll ah hian roll hmasa aiin mi 2434-in an tlem zawk a, heng mi te hi Booth Level Standing Committee ten uluk taka an zirchian hnuah roll a telh tawhloh an ni. SIR 2026 kalpui meka Final Electoral Roll hi September ni 7 (Thawhṭanni) ah tarchhuah a ni dawn a ni.