Kumin December thlaa Mizoram State Games, Aizawla neih tur atana inpuahchahna neih mek leh Champhai khawpui mamawh hrang hrangte sawihona chu  vawiin khan Champhai  DC Conference Hall-ah Dr. ZR Thiamsanga MLA, Vice Chairman, Health &  Family Welfare Board hova neih a ni.

Dr. ZR Thiamsanga chuan Champhai District chu infiamna huanga sulhnu nei tha tak anih thu leh State Games neih turah pawh beiseina sang tak neih ani, a ti a. MLA Bial inelna ang ni mahse District pumpui dengchhuak inelna huhang nei tak a nih angin sawrkar department, mipui mimir leh pawl hrang hrangte chu district tihmingtha turin thahnemngai taka kan thawhho a ngai a ni, a ti a. Champhai North bialtu MLA chuan Champhai District chu Mizoram District dangte tana entawntlak District Model,  thianghlimna, faina leh mawina kawnga midangte tihhmuh theitu ni tura hmalak a ngaih thu a sawi a. Zirna  kawngah nasa lehzuala tan lak angaih thusawiin, thiam elna hrang hrang leh hnasang laknaahte   tam zawk lan a tul thu a sawi a. Champhai district chhunga AIDS natna leh Damdawi hman khawloh hluar lutuk a vei thu pawh sawiin, natna do leh a taidarh zel tur ven kawngah ngawrh lehzuala tanho a ngai a ni, a ti bawk.

Health & Family Welfare Board Vice Chairman chuan Mizoram sawrkar hmalaknain Champhai District Hospital chu hmanraw changkang zawk nena thuam famkim mek zel anih thu tarlangin, November thla tawp lamah chuan  Dialysis khawl leh ICU te bunfel hman tum anih thu a sawi a. Khawpui chhung Plan mumal leh fel tak nei thei tura hmalak mek zel anih thu a sawi a. Ei leh bar intodelh tumin  Socio -Economic Development Policy (SEDP) hnuaiah Functional Board 14 duan niin, Vice Chairman  theuhte kaihhruainain chak taka hmalak tum a ni a,  Agriculture leh a kaihhnawih department-te an pawimawh  hle dawn a ni, a ti a. Dr. ZR Thiamsanga chuan Champhai South bial chhunga Model Village atana thlan Tlangsam leh Champhai North bial chhunga Ngur khuate  Model Village anih anga cheibawl kawngah department hrang hrangte tawiawmna a ngen nghal bawk a ni.

He hunah hian Champhai North leh South Assembly Constituency atangin hmalak tawh leh hmachhawpte ngaihthlak a ni a. Constituency aiawhte chu District hmellanna tur an nih angin medal la thei tura beisei neihte chauh intirh a, training tha tak pek nise tih a ni a. Senso phuhru tura suam tuak  dan  turte sawiho  a ni a. Champhai khawpui mamawh hrang hrangte sawiho a ni bawk a, khawpui fai, thianghlim leh mawi siam anih theihna turin Clean, Beautiful & Healthy Champhai District Committee dina, hemi hnuaia Traffic Management leh Road Protection Squad tuaithar lehte, khawpui chhung cheimawia faina lama hmalakte, Ran khuahkhirh leh hriselna kawnga hmachhawp hrang hrangte, HIV pung chak lutuk tur leh Ruihhlo  hluar vente, Malaria Free leh hmalakna tur hmachhawp hrang hrangte zau taka sawi ho a ni bawk. 

Vawiin Metting-ah hian Champhai DC Pu S.L Naveen, IAS chuan kalkhawmte lawmna thusawiin, Mizoram State Games   neih tur chu phurawm hle a hriat thu sawiin, Champhai District in District ang zawng pawha a titha ber anih theihna turin thawhho a ngai ani tiin, Department hrang hrang hotute chu  an theihna ang zelah theihtawp chhuaha tawiawm turin a chah a ni. Meeting-ah hian Sawrkar department hrang hrang hotute, District Sports Committee, Mizoram State Games atana MLA bial tina hruaitu ruatte leh NGO te an tel tha hle a ni.