1202/2026-2027

Dated Champhai, 25th June 2026:  Vawiin khan Circuit House, Champhaiah Nasha Mukt Bharat Saptah (Drug Free Week, 2026) kharna neih a ni a, Pu Mohammad Aaquib, Chairman, NMBA leh Champhai District Bawhrsap ni bawk chu khuallian a ni.

Bawrhsap Pu Mohammad Aaquib chuan damdawi hmansualna tihtawp chu he programme hian a tum ber a nih thu a sawi a, Champhai hi ramri a nih angin damdawi a hluarin, tam tak man a nih thin thu a tarlang a, thlatin NCORD thutkhawm ah ruihhlo tam tak thlatin man a nih dan report ngaihthlak thin a nih thu a sawi a, hei hian Champhai mipuite chu ruihhlo do kawngah tha thawh vek a tul zia a lan tir thu a sawi a, Champhai mai bakah Mizoram puma Home hrang hrangah damdawi hmansual avanga enkawl mi tam tak an awm thu a sawi a.

Damdawi hmansualna hi hote a kan ngaih vaihlo leh a kaihhnawih atanga bul tan a nih tlangpui thu sawiin damdawi hman sual loh leh vaihlo lam hrim hrim khawih loh hi kan hriselna atana thil pawimawh tak a ni, a ti a, a bik takin thalaite chu ruihhlo hrang hrang laka fihlim turin a ngen a, an lo ti tawh a nih pawhin an theihna zawng zawng hmanga ruihhlo bawih atanga talchhuah tum turin a chah bawk. Champhai tana thalai duhawm leh tangkai an nih theihna tura ruihhlo laka fihlim ngei turin duhsakna a hlan a, Champhai Buffalo te'n an support thinnaah lawmthu a sawi bawk.

He hun hi Dr. Peter Malsawmtluanga, SDO (Sadar) chuan kaihruaiin Nasha Mukt Bharat Abhiyan - Viksit Bharat Ki Pechaan tih chu thupui atan hman a nih thu tarlangin a awmzia a sawifiah nghal a, Nasha Mukt Bharat Abhiyan awmzia chu Drug Free India Campaign tih niin Viksit Bharat Ki Pechaan chu Identity of Develope India tih a nih thu a tarlang a, August ni 15, 2020 ah he programme hi hawn a ni a, Champhai ah chuan nikum ah khan a vawi 1 na atan hmangin kumin hi a vawi 2 na a nih thu a sawi bawk.

Pi Thelma R. Zonunmawii, Member Secretary, NMBA Champhai chuan kalkhawmte lawmna thu a sawi a, Pu Lokeshwaran R, Superintendent of Police, Champhai chuan thu a sawi ve bawk. Anni bakah hian Pu PC Lalrawnliana, President SYMA Champhai, Pi Lalhlimthangi Khiangte, President MHIP Sub Headquarters, Champhai leh Pu K. Lalrintluanga, President MUP District Headquarter, Champhai te chuan thu an sawi ve bawk.

Drug Free Week, 2026 kharna hun pual hian Champhai Buffalo te chuan New Champhai atanga Circuit House thleng Bike Rally an nei a ni. Lawmna hun ah hian zairhuamte zai ngaihthlak a ni a, SYMA Cultural Troupe te hnam lam mawi tak an entir bawk.

He hunah kalkhawm te chuan ruihhlo leh a kaihhnawih laka fihlim turin thutiam an la a, tleirawl lai atanga ruihhlo lo khawih tawh hneh ta te testimony ngaihthlak a ni bawk.