244/2022-2023
Champhai, the 22nd April, 2022: Vawiin khan India ram hmun dang rualin Champhai District Level Coordination Committe on National Deworming Day (NDD) buatsaihin Champhaiah National Deworming Day 2022 puala hun hman a ni a, Champhai District Bawrhsap Pu James Lalrinchhana chuan he hun hi khuallian ni a hmanpuiin a hawng a ni.

National Deworming Day hawnna hun Govt. Roseland School-a neihah khuallian Pu James Lalrinchhana chuan hriselna kawnga hmalakna pawimawh hmasa rulhut hlo ei leh a pawimawh chhan inzirtirna National Deworming Day chu Sawrkarin a ngaipawimawh hle tih sawiin, kan ram chak leh chak loh innghahna a ni, a ti a. Kan tanrual chuan district dangte umtu ni lovin hmahruaitu kan ni thei dawn a, rulhut natna pawh hi kan do hneh thei dawn a ni, a ti a. India rama naupang maktaduai 241 te chu lei (Soil) atanga rulhut kai thei reng dinhmunah an din mek thu leh naupang thla 6 atanga thla 59 inkar 10 zela 7 te chuan Iron tlakchhamna an nei mek tih sawiin, kum 1 atanga kum 19 inkar naupangte'n rulhut an pai loh hi National Deworming Day in a tum ber a ni, a ti bawk.

Pu James Lalrinchhana chuan rulhut chuan taksaah iron tlakchhamna leh natna dang a keng tel thei a, naupangte taksa bakah an rilru than thlenga a tih thut theih avangin zirna kawngah nasa takin a nghawng thei a ni, a ti a. Kan ram chak leh chak lohna hriltu pakhat a nih theih avangin zirlaiten rulhut hlo an ei ngei chu sawrkarin a ngai pawimawh lehzual tih a sawi a. Champhai hmasawnna chungchangah deparment hrang hrangte an tanho a, ram thatna atana an thawh phawt chuan District hnufual an nih loh tur thu sawiin, department tinte chu thawhhona tha ngai pawimawh turin a chah a ni.

Thusawitu dang DEO Champhai Pu TT Laltanpuia chuan khualehtui ten hriselna tha tak an neih hi sawrkarin a ngaipawimawh hle a ni, a ti a. Sawrkarin sum tam tak sengin a thlawnin damdawi min pe a, damdawi ei hi keini pawhin kan ngaipawimawh hle tur a ni a ti bawk.

National Deworming Day hawnna hun hi Dr. Zatluanga, District Medical Superintendent chuan kaihruaiin, Er. ZD Dengthuama, EE, PHED, Pu Lalramzauva, DEIC Manager (NHM) te hnen atangin thusawi ngaithlak a ni bawk.

National Deworming Day-ah hian Sub-Centre, School, Anganwadi leh College-ah rulhut hlo hi a hlawma sem chhuah a ni a. Zirna ina inziaklut lote chu ASHA ten an inkah kalchilhin an pe dawn bawk a. Vawiin atang hian rulhut hlo ei runpui tan nghal a ni a, ei tura tinzawn ten an ei vek theih nan leh tihhmaih an awm loh nan thual nawnna Mop up Day April ni 27 hian kalpui a ni ang.