No.7602/2020-2021

Naupang kum 1-19 inkarten rulhut an pai lohna tura  rulhuthlo pek beihpui leh rulhutin a nghawng thalote inhrilhhriatna hun National Deworming Day 2021, thawhkhatna February Ni 22 atanga Ni 26, 2021 chhunga kalpui tur pualin vawiin chawhma khan Govt. GM High School, Champhaiah hun hman a ni.  Champhai District Bawrhsap Pi Maria C.T. Zuali chuan khuallian niin he hun hi a telpui a,  zirlaite hnenah   rulhuthlo Albendazole Tablet sem chhuaka eitirin bul a tan a ni. 

He hun DEO Pu  T.T Laltanpuia kaihhruaiah hian khuallian Pi Maria C.T. Zuali chuan ram hmasawn zelah hriselna kawnga hmalaknate ngaihpawimawh a nih thu sawiin, National  Deworming Day chu rulhut laka naupangte an fihlim theihna tura hmalakna pawimawh tak a nih thu a sawi a. Ei in leh ran vulhte atanga rulhut kai theih hrang hrangte sawi zauin, zirlaite chu ei leh in hrisel, fai leh thianghlimte chauh ei tur leh chenna in leh a velte vawngfaia ngun taka kut silfai thin turin a chah a. Rulhut vanga  thisen tlakchhamna  anaemia awm thin chuan taksa chaklohna, naupiang hrisel lohna leh nghawng tha lo tak takte a thlen thin avangin hmeichhiate tan  Iron leh Folic Acid ei ngaihpawimawh a tul thu a sawi bawk.

CMO Champhai Dr. R.Lianmawia chuan National Deworming  Day (NDD) chungchang a sawifiah a. National Deworming Day chu Mizoramah kum 2016 atangin National Rural Health Mission hnuaiah hman tan a nih thu sawiin, February leh August thlaahte Deworming Month hman thin a ni, a ti a. Naupangte hnena  rulhuthlo pek thin Albendazole Tablet chu huam zau leh him bera ngaih a nih vanga thlan a nih thu leh kum dang angin NDD kalpui theih ni lo mahse  ASHA Worker, Anganwadi leh School kaltlang te’n theih ang anga pekchhuah tum a nih thu a sawi a. India ram thingtlang khuaa  thanglai naupang tam takte thisen tlakchham  chhan chu rulhut pai vang a ni tih finfiah a nih hnuah nuaibo turin National Deworming Day kaltlangin chak taka hmalak a nih thu a sawi a. Thisen nei tlem chunga naupaiin naute sawngnawi leh chhiat thlenga a awmtir theih thu pawh sawiin,  rulhuthlo ei beihpui thlak chuan nakin zel atan nu nau chunga thi leh nausen  thite  ven kawngah  kawngro thui tak a su thei dawn a ni, a ti bawk. 

National Deworming Day hi kum khatah tum hnih neih thin a ni a. February  leh August thlaahte kalpui thin niin, nikum 2020  August thlaah khan NDD kaltlangin Champhai District chhunga naupang  kum 1-19 inkar 45626  te rulhuthlo pek an ni a, hei  hi  target za zela  99.75 a ni.  Kumin a thawhkhatna  February  NDD ah hian naupang  47397  te hnenah rulhuthlo pek tuma ruahmanna kalpui chhoh mek a ni. Rulhuthlo  Albendazole mum khat zel hi 400 mg a ni a. Kum 2 hnuailam tan  mum chanve  200 mg a ei tur a ni a. Kum 2 chin chunglam tan mum khat  400 mg a ei tur a ni. Kumin August thlaa  NDD  thawhnihna neih turah hian ei chhunzawm  tur a ni ang. 

He hunah hian Pi Maria C.T. Zuali DC, Dr. R.Lianmawia CMO, Pu T.T Laltanpuia DEO, Dr. Lallawmkima DIPRO, Pu H.Zothanmawia CDPO, Pu H.Lalhminghlua  Addl. DPC,  Samagra Shiksha, Zirtirtute leh Zirlaite an tel a ni.