3954/2024-2025

Champhai, 24th January 2025: Vawiin  khan District Hub for Empowerment of Women, District Programme Office chuan National Girl Child Day 2025 leh Beti Bachao Beti Padhao kum 10 tlin lawmna an nei. He hun hi Govt. TM High School, Zote ah leh District Hospital ah hman a ni.

National Girl Child Day  lawmma hi Govt TM High School ah neih niin Pu Lalchhandama Renthlei, Headmaster, TM High School chuan a kaihruai a. Pi K Lalrinfimi, District Mission Coordinator chuan National Girl Child Day lo chhuah dan leh Beti Bachao Beti Padhao (BBBP) scheme chungchang sawizauna hun a hmang a. National Girl Child Day hi kum 2008 atang khan hman tan a lo ni tawh a, hmeichhe naupang dawmkan leh thlawpna lantirna atan bakah Child Sex Ratio (naupang kum 6 hnuailama mipa 1000 zela hmeichhe awm zat)  tlahniam nasa lutuk do nana he ni hi hman a ni, a ti a. Beti Bachao, Beti Padhao scheme hnuaiah he programme hi hman thin a nih thu a tarlang bawk a ni. Pi K. Lalrinfimi hian Prohibition of Child Marriage Act 2006 leh Pre-Conception & Pre-Natal Diagnostic Technique Act 1994 zirtirna a pe bawk.

National Girl Child Day pual hian Quiz hmanga inelna buatsaih a ni a, zirlai naupangte chu Women & Child Development hnuaia hmalakna chi hrang hrang hmangin an inel a. He hun hi Pu Rodingliana, Specialist in Financial Literacy chuan a kaihruai a ni.

He ni pual hian hmeichhe naupangte tan Sanitary Pads sem a ni bawk a. Hei hi hmeichhe naupang hriselna kawnga hmalakna pakhat a ni.

Chawhnu lamah District Hospital ah hmeichhe naupiang lawmpuina hun hman a ni bawk a. Kum danga an lo tih tawh ṭhin angin hmeichhe naupiangte hnenah lawmpuina pawisa leh thildang an hlan leh a ni.

National Girl Child Day 2025 pual hian District Programme Office chuan hmeichhe naupangte tan Badminton Coaching te, Effective Communication Class te a kalpui mek a. He ni denchhen hian kar hmasa inrinni khan Tlangsam ah “Walk for the Girl Child” chu a lo buatsaih tawh bawk a ni.