2015/2026-2027

Dated Champhai, the 1st September 2026 : Vawiin khan Govt.Vengthlang Middle School Champhaiah National Nutrition Month pualin School Nutrition Garden Programme hawnna neih a ni a, Deputy Commissioner Pu Mohammad Aaquib chuan a hmanpui.

School Nutrition Garden hawnnaah hian Deputy Commissioner chuan thu a sawi a, thla hnih liam ta velah kha chuan Champhaia school tam zawkte hian Nutrition Garden an nei lo a, chumi an veina aṭang chuan Project Lead leh PM Poshan chu kal kawp tirin zirlai naupang ten eitur hrisel leh thianghlim an neih theihna tura hmalakna a nih thu a sawi a. Zirlaibu piah lama thiamna an zir chhuahna, taksa leh rilru hrisel an neih theihna tura puitu a nih theih ngei a beisei thu sawiin, naupang te chu an chhungte, an district, an state leh an ram innghahna an la nih dawn thu hrilhin, kawng dik an zawh chhoh zel a, chu Nutrition garden chuan chu hmasawnnaah pawh chuan a puih theih ngei a beisei thu a sawi a ni.

Champhai District Education Officer Pi K.Lalsiamliani pawhin zirlai naupangte chu an school-a an thlai huan neih ṭheuhte uluk taka enkawl turin a fuih a, an rilru leh taksa lama hlawkna nasa tak petu a nih theih ngei a beisei thu a sawi bawk. 

DC hian thlai chi te thlakin, Govt. Vengthlang Middle School Headmaster Pu Lalvena Khiangte hnenah an school-a an chin tur thlai chi a hlan chhawng nghal bawk a ni.

School Nutrition Garden  Programme hawnna hi Champhai District-a elementary school hrang hrangah hman niin, Champhai District Transformation Programme hnuaia Project LEAD nen kal kawptir a ni a, National Nutrition Month/ Poshan Maah (September) denchhenin Champhai District chhunga Elementary School tam thei ang bera kalpui tura hma lak a ni