118/2024-2025 

Champhai, the 9th April, 2024: Tun thla April ni 19, 2024 a neih tur General Election to Lok Sabha, 2024 a duty tur Polling Personnel-te tan vawiin khan Govt. GM Higher Secondary School, Champhai Vengsangah training thawhhnihna neih chhunzawm a ni a; tihian Champhai District chhunga Polling Personnel-te tana training thawhhnihna buatsaih chu zawhfel a ni.

He hun hmanpuitu District Election Officer (DEO) Pu James Lalrinchhana chuan kalkhawmte chu District chhunga inthlanna buaipui tura mi rintlak tak tak thlanchhuahte an nih thu leh Sawrkarin Polling Station enkawl turin an chungah rinna a nghah tlat thu sawiin, ka ti thei a ni tih rilru pu chunga mawhphurhna an neihte tha taka hlen chhuah theuh tum turin a fuih a. A bultanna Mock Poll ngaipawimawh tur leh bultan thatin awmze thui tak a neih avangin fimkhur taka duty tum turin a chah a. Danin a phal lohte ti lo tura chahin, team anga thawkho tur an nih avangin Team Leader Presiding Officer-te thu zawma ngaichang thiam turin a chah a. Training material leh handbook-te hre bel tur leh in lamahte pawh bihnawn fo turin a fuih a. Inrintawkna nei turin training chhawr tangkai a tul thu sawiin, inzirtharna hun atana hman tum theuh turin a chah a. Inthlan tibuai thei nungchang mawi lo, ruihhlo leh a kaihhnawih laka inthiar fihlim tum turin a chah nawn leh bawk a. Puih ngaite pui turin District Election Office a inhuam reng thu leh hrem ngaite chungah dan anga hmalak zel a nih tur thu a sawi bawk.

Thusawitu dang Deputy District Election Officer (Dy. DEO)/Addl. DC Pu K. Zorammuana chuan Polling party-te team anga siam fel an nih tawh thu tarlangin, thawhpui turte siamfel a nih tawh avangin team anga hmalakho thiam tum turin a fuih a. EVM/VVPAT leh form pawimawhte thiam bel tum tura fuihin, DC Office-ah EVM/VVPAT training nana hman tur khawih theiha chhawpchhuah reng a nih thu leh form pawimawhte engtik lai pawha zawhfiah reng theih an nih thu a sawi a. Polling Station a chetvelnate webcasting kaltlanga vil a nih dawn avangin election inkaihhruaina zawm that a pawimawh dawn thu a sawi bawk.

Champhai District huamchhunga Assembly Segment pathum, 23-Champhai North AC, 24-Champhai South AC leh 25-East Tuipui AC hnuaia Polling Station 84 atan Polling Personnel mi 440 (Presiding Officer, Polling Officer I, Polling Officer II leh Polling Officer III atan Official 110 theuh) te ruat niin, second randomization neih zawh tawh a ni a. Polling personnel-te hian an duty-na tur Assembly Segment an hriat tawh bakah an duty pui turte nen team siam rem a ni tawh a. Vawiin training-ah pawh hian team ang zela thut tlan tir niin, training an nei tlang a ni. Polling personnel-te'n an duty-na tur Polling Station an hriat theihna tur Final Randomization of Polling Personnel chu vote thlak ni thlen hmain khawl hmanga siam rem a ni ang.

Polling personnel training thawhhnihna hi ni hnih chhung neih niin vawiin training-ah hian Polling party Team 46 an tel a; heng zingah hian hmeichhe hlang duty-na tur Pink Polling Station-a inthlan buaipui tur polling party team 4 an tel a. Nimin khan Team 56 te'n training an lo nei tawh bawk a ni. Ruahman dan chuan training thawhthumna leh a hnuhnung ber tur chu April ni 17, 2024 hian buatsaih a ni ang.

He hunah hian Pi Lalhruaitluangi, SO/SLMT, Pu N. Lalzarzova, BDO Khawbung/ DLMT, Pu Moses Lalfakawma Tlau, SDC/ALMT leh Dr Vanlalnunpuii Ralte, SDC/ALMT te'n Polling party-te mawhphurna hrang hrang, form pawimawhte leh EVM/VVPAT khawl hman dante an zirtir bakah a taka entir a ni a. Pu K. Lalngaihzuala, DLMT (Poll Star)/DIO, NIC leh Pu Zairimawia (Poll Star)/NE, NIC te'n Poll Star hman dante an zirtir bakah a taka entir a ni bawk.

Polling personnel training-te hian QR Code scan-in attendance an dah a. Election Duty Certificate (EDC) pek chhuak nghal zel an ni bawk.

General Election to Lok Sabha, 2024 atan hian Champhai District Assembly Segment 3 te chu Zone 13 ah then niin, Zone tinahte hian Sector Officer leh Sector Police Officer-te ngawrh takin an duty mek a. Election Expenditure Monitoring hnuaia team hrang hrang; Assistant Expenditure Observers, Flying Squad (FS), Static Surveillance Team (SST), Video Surveillance Team.(VST), Video Viewing Team (VVT), Accounting Team (AT), Media Certification & Monitoring Committee (MCMC), District Expenditure Monitoring Committee (DEMC) te bakah Enforcement Agency hrang hrangte'n inthlan senso leh MCC kenkawh chungchang an vil mek a ni.

February ni 8, 2024-a Final Electoral Roll tlangzarhin a tarlan dan chuan Champhai District-ah voter 57,454 an awm a. Heng zinga 28,018 hi mipa niin 29,436 hi hmeichhia an ni.