Mizoram State Disaster Management Authority thurel bawhzuiin vawiin chawhma khan Champhai District Disaster Management Authority chu Chairman Pu SL Naveen, IAS hovin DC Conference Hall-ah an thukhawm a, chhiatrupna lo thlen thulha rang taka chet la vat theitu tur Quick Response Team (QTR) din dan tur chungchang an rel a ni.

District Disaster Management Authority thukhawm chuan Champhai District pualin Quick Response Team din tha a ti a. Team-ah hian chhiatrupna laka chet lak dan thiam, zirtirna tha tak dawng volunteer member 9 an awm theih dawn thu tarlan niin, team-a tel turte thlanna atana tehfungte pawh State Disaster Management Authority-in a duan anga kalpui nise tih a ni a. He volunteer hna diltute chu Medical leh Physical examination uluk taka lak anih hnuah interview neihpui leh nise tih niin, Selection Committee pawh meeting hian a din nghal a. Dilna form leh hriat tur tulte peihfela vata, tun thla chhung ngeia dilna awm angte thehluh vek hman tuma hmalak nise tih a ni bawk.

District Quick Response Team atana volunteer member 9 turte hi uluk taka thlanchhuah an ni dawn a, hmanraw tha ber berte leh training tha tak neihpui tum an ni. Quick Response Team member-te hun chhung hi kum khat atan a ni phawt ang a, a tul anga pawhsei leh zel tur a ni ang. Diltu chu rilru leh taksa hrisel, kum 21 aia naupang lo leh HSSLC chin chunglam a ni bawk tur a ni. Duty laia intipalh emaw inhliam palhin zangnadawmna siam sak an ni dawn a, Life Insurance-te tihsak vek tur an nih mai bakah chhiatrupna thleng thulh huna an chetchhuahna ang zelin State Disaster Response Fund (SDRF) kaltlangin lawmman pek thin an ni dawn a ni.