No.2055/2021-2022

Aizawl, the 30th August, 2021: Vawiin khan National Bank for Agriculture and Rural Development (NABARD), Mizoram Regional Office buatsaihin Rural Infrastructure Development Fund (RIDF) chungchang inhrilhhriatna hun ‘District Level Sensitization Workshop on RIDF’ chu DC Conference Hall-ah neih a ni a. He hunah hian RIDF chungchang inzirtirna leh hemi kaltlanga project awmte engtinnge kan chhawr tangkai lehzual theih ang tih chu mithiamte nen zirho a ni.

He hun kaihruaitu Champhai District Bawrhsap Pi Maria C.T Zuali chuan hmasawnna ruhrel leh hmachhawp hrang hrang siam kawngah line department chauh ni lo, Directorate thlenga thawhhona tha tak neia hnathawhte inhriatpui tawn zel a pawimawh thu a sawi a. NABARD kaltlangin Rural Infrastructure Development Fund hnuaiah thingtlanga hmasawnna ruhrel siamna tur project siam theih a ni chu lawmawm a tih thu sawiin, hemi hnuaia hamthatna awmte Champhai District-in a nihna tur ang taka a hman theih nana theihtawp chhuah turin sawrkar department hotute a chah a. RIDF chungchang inhrilhriatna hun buatsaih a ni chu lawmawm a tih thu sawiin, he hun chhimtu leh district dinhmun hrechiangtu sawrkar department hotute chu tangkai taka RIDF project-te hman a nih theihna tura theihtawp chhuah turin a sawm a. Department project kalpuite chu neitu thinlung pua uluk taka enzui thin tur leh thangtharte tana hmasawnna ruhrel tha leh rotling hnutchhiah tum turin a chah bawk a ni.

Resource Person Pi H.Lalhmachhuani, DDM, NABARD Champhai chuan Rural Infrastructure Development Fund (RIDF) chungchang zirtirna hun neiin, RIDF chu Sawrkar laipui leh RBI ten NABARD kaltlanga an kalpui a nih thu a sawi a. RIDF kaltlangin hna peng hrang hrang 37 ahte loan pek chhuah a nih thu pawh sawiin, loan punna a tlem avang leh buaipui a awlsam avangin a remchang hle a ni, a ti bawk. Champhai District-a RIDF project-in a huam tel department hrang hragte chu RIDF kaltlanga hamthatna awmte ngaihven tura chahin, hmasawnna ruhrel siam kawngah thahnemngai taka thawhhopuiah a sawm a ni. RIDF hnuaia project hrang hrang kalpui tawh leh kalpui mekte a tarlan bakah, Warehouse Infrastructure Fund (WIF) kaltlanga hmalaknate a tarlang bawk.

RIDF kaltlang hian Agriculture leh a kaihhnawih Sector Project-ahte loan 95% pek a ni a, Social Sector Project leh Rural Connectivity Project-ahte loan 90% a pek niin, loan punna hi kum tin za zela 2.75 a ni mek a ni. August ni 27, 2021 thleng khan NABARD chuan RIDF Project Mizoram (I to XXVI) kaltlangin project pawmpui 641 thawh nan loan cheng vaibelchhe 1596.35 a sanction tawh a, heta tang hian cheng vaibelchhe 1000.08 chu NABARD atangin hmuh tawh niin, hei hi loan sanction atanga za zela 62.65 (62.65%) a ni. Financial Year 2020-2021 atan cheng vaibelchhe 266.34 sanction niin, heta tang hian cheng vaibelchhe 151.85 chu NABARD atangin hmuh tawh a ni bawk.

Champhai District bikah chuan August ni 27, 2021 thleng khan Implementing Department panga- PHED, P&E, A.H&Vety, FCS&CA leh I&WR Department ten project 13, RIDF loan cheng nuai 7442.61 sengin an thawk zo tawh a. Cheng nuai 6366.71 senna tur RIDF project kal lai mek 15 awm bawkin, Implementing Department panga- PWD, PHED, School Education, H&FW Department leh Agriculture Department hnuaiah thawh mek a ni a. Heng bakah hian Warehouse Infrastructure Fund (WIF) hnuaiah cheng nuai 548.03 hu RIDF project 8, Implementing Department pahnih- Horticulture leh FCS&CA Department ten an kalpui bawk a, project 8 zinga 2 te hi thawh zawh tawh niin, a dang 6 te thawh mek a ni.

District Level Sensitization Workshop on Rural Infrastructure Development Fund (RIDF) ah hian RIDF hnuaia project hrang hrang kalpuitu leh a kaihhnawih department hotulute an tel a ni.