No.7199/2020-2021

Vawiin January Ni 18, 2021 atanga tana February Ni 17, 2021  thleng awh tur Road Safety Month tum 1-na hawnna hun chu District Road Safety Committee buatsaihin Champhai DC Conference Hall-ah chawhnu dar 1 khan neih a ni a. He hun hi  Addl. DC Pu R.Lalnghakliana,  District Road Safety Committee Chairman ni bawk chuan Khuallin ni a hmanpuiin Road Safety Month 2021 Champhai District chu a hawng a ni.  Kumin hian ‘Fimkhur la, Nun humhim rawh’ tih chu thupui thlan a ni.

Pu R.Lalnghakliana chuan sawrkarin inkaihhruaina dan a siamte chu kan zavaia tana himna tur anih avangin mipui te’n tha taka kan zawm tlat hi kan mawhphurhna a ni, a ti a. Traffic rules chu dan zawmlote tan chauha duan a ni lova lirtheia chuangte leh  ke a kal mipuite himna  tura duan anih thu sawiin, dan zawm kawngah tan lak thar a tul thu a sawi a. Traffic Police leh dan kengkawhtute chu tan la sauh sauh tura  chahin, khawng taka dan kenkawh chuan mipuiteah  zirtirna nasa tak a pe thei dawn  a ni, a ti a. Inngaihhnathiamna awm lova endikna kalpui thin atanga  dan zawmlo mi tam tak man an ni thin leh lirthei chhuak a tlem phah sawt thinte chuan dan kan zawm that loh thin  zia a lantir a ni, a ti a. Champhai district chhungah Road Safety Month awmze nei tak, mipui te’n tha taka an zawma,  hlawkthlak taka hman anih theihna tura duhsakna hlan chungin Road Safety Month 2021 chu a hawng a ni.

Hawnna hun hmanpuitu Pu Rex Zarzoliana Vanchhawng, SP Champhai hnen atangin Road Safety kaihhnawih thusawi ngaihthlak a ni a. Lirthei chunga chetsualna tam ber chu rui chunga lirthei khalh leh tlan chak luat vangte anih thu a sawi a. Lirthei chetsualna avanga thihna tam ber chu ke hnih nei lirtheia chuangte an nih thu sawiin, himna tura tangkaite zawm leh helmet khum ngaipawimawh chunga lirthei khalh chu tikmakmawha neih a tul thu a sawi a.  Hmanhmawh luat vangin lirthei accident tam tak a thlen thin thu pawh sawiin, kan thlen tumna hmunte him taka kan thlen dawn phawt chuan thlen tlai deuh pawh kan inhuam a angai a ni, a ti bawk. Champhai SP chuan lirthei khalhtu  leh mipui nawlpui tana hriatthiam theih tur dan hriat tul zual bikte siama semchhuah tuma hmalak a ngaih thu a sawi a.  Champhai khawpui leh a chhehvel hmun lun leh lirthei chetsual thlen tamna hmunahte lirthei khalh chak leh hawklakte veng tur  Police duty dah thin anih thu a sawi bawk. 

Hawnna hun hi Pi R.Lalnunkimi, District Transport Officer (DTO) & Member Secretary, District Road Safety Committee chuan a kaihruai a. Road Safety Week mai duhkhawp lova Road Safety Month  hman tan  a lo nih tak thu sawiin, khawvela motor accident thleng za zela 6 chu India ram thleng a ni, a ti a. Kum 1988 ah National Road Safety Council din anih thu leh 1989 atangin kum tin Road Safety Week hman anih thu a sawi a. Road Safety Month hman chhungin Enforcement leh MVI lam te’n khauh lehzualin endik hna an kalpui tur thu leh dan zawm lote dapchhuakin hremna an pek dawn thute, lirthei khalhtu leh mipui hnenah zirtirna a theih anga zau leh remchang ang zela kalpui tum anih thu a sawi bawk. 

He hunah hian Pu R.Lalhruaitluanga, Motor Vehicle Inspector (MVI) Champhai kaihhruaiin kalkhawm te’n Road Safety pualin intiamkamna an nei a. DTO & Member Secretary, District Road Safety Committee Pi R.Lalnunkimi  chuan lawmthu sawiin hawnna hun hi a khar a ni. He hunah hian Champhai District Road Safety Committee member-te an tel a ni.