2255/2022-2023
Champhai, the 10th October, 2022: DC Office Champhai leh Mizoram Information Commission (MIC) tangkawp buatsaihin vawiin khan Right to Information (RTI) Act, 2005 chungchang inzirtirna DC Conference Hall-ah neih a ni. He hun hi District Bawrhsap Pu James Lalrinchhana, District Appellate Authority (DAA) ni bawk chuan hmanpuiin training hi a hawng a ni.

Pu James Lalrinchhana chuan Champhaia RTI Act chungchang inzirtirna hun tha tak buatsaih a ni chu lawmawm a tih thu sawiin, hemi chungchang zir tura kalkhawmte chu zirlai rilru pua zir tum tur leh department hmalaknate hriatchian duh an awm changa tanpui thei tura inzir turin a fuih a. Right to Information Act 2005 chungchanga training pe thei tura ruat master trainer tha tak takte kaltlanga zirtirna buatsaih a ni chu vanneihthlak a tih thu pawh sawiin, thiam loh leh hriat loh hriat fiah nana hman a pawimawh thu a sawi bawk.

District Bawrhsap chuan sawrkar department hotute chu hmasawnna leh dan thar chhuak ang zela inherrem thiam tur leh intuaithar zel turin a chah a. District hmasawn nan tanrual thiam a ngaih thu sawiin, thiam loh leh panna lai kan neihte kan chaklohna a nih zel dawn avangin inenfiah chung zela kan intuaihriam angai a ni, a ti a. RTI Act kaltlangin zawhna zawh theih reng kan nih avangin dan hnuaiah fimkhur leh taima tak, mipuite hmakhua ngai chunga hna kan thawh a ngai tiin, RTI Act hmang pawha zawh tlak leh RTI Act kherlo hmang pawha information pe thei nih tum turin kalkhawmte a fuih a. Mite lipse leh belhchian dawl, langtlang leh midangte tana malsawmna nih tum tura chahin, district nuam leh chak tak din tura tanlak puiah department hotute a sawm a ni.

He hun hi Pi Esther Leihang, SDC chuan a kaihruai a. District Resource Person atana ruat pahnih, Pu C.Lalthazuala, Assistant Commissioner of State Tax, Champhai leh Pi Lalhruaitluangi, Assistant Professor, Govt. Champhai College-ten kalkhawmte zirtirna an pe a. RTI Act chungchanga pawimawhte bakah online hmanga kalpui dante, Mizoram Right to Public Services Act, 2015 leh tul dangte zirho a ni a. Zawhna leh chhanna hun hlawkthlak tak hman a ni bawk.

He hunah hian District Appellate Authority (DAA), State Public Information Officer (SPIO) leh State Assistant Public Information Officer (SPIO) te an tel a ni.

RTI Week hawnna chu naktuk October ni 11, 2022 chawhma dar 11:30 hian I&PR Auditorium, CHANEM Building-ah MIC Secretary Pu H.Dolianbuaia hovin neih a ni dawn a. RTI Act chungchang inhrilhhriatna khawtlang huapa buatsaih a nih dawn bakah inzirtirna lemchan entir a ni bawk ang.