No.3436/2019-2020

Covid-19 natna lengdarh zel tur do kawnga hmalakna kalzelah  vawiin khan Champhai  Vengthlang North YMA In-ah  lockdown kalpui chhunga harsatna tawk mek ruihhlo ngaite enkawla khuahkhirh dan tur rel a ni. 

Pu Lalnunfela Chawngthu, SDO Sadar Champhai hova thukhawm chuan    Covid-19 inkaidarh lohna tura sawrkarin inkharkhipna dan lockdown a kalpui chhunga  ruihhlo ngaite leh zuarte tunhnaia man an ni leh thin chu veiawm tiin,  natna pudarh theitu an nih avangin venthawn thilah chak lehzuala enkawla khuahkhirh   tha a ti a. Champhai chu ramri depa awm anih avangin fimkhur lehzual angaih thu tarlan niin, Champhai khawpui chhunga tlawmngaih chhuaha ruihhlo ngaite leh zuartute tihrem kawnga thawktu zawng zawngte leh  enkawl thintute chungah meeting chuan lawmthu a sawi a ni. 

Thukhawm chuan lockdown hun chhunga   ruihhlo ngai leh zuar chhuak thinte chu Village Level Task Force te’n mahni huamchhung theuhah phak tawkin lo khuahkhirh thin nise, khuahkhirh theih bak chu  thuneitute hnenah thlen a, a tul anga enkawlna tur hmunhma ngaihtuaha,  khunghrana khuahkhirh  mai nise tiin a rel a. Enkawlna senso leh mamawh dangte chhawmdawl kawngah  a tul ang zelin  sawrkarin hma la se tih a ni bawk. Meeting chuan tul tawpkhawkah lo chuan pawnchhuak tam lo tur leh intlawhpawh lo turin mipuite a ngen a ni.

Covid-19 hrileng mek do let kawngah Mipui, Village Level Task Force, Kohhran, NGO hrang hrangte leh media te’n theihtawp chhuah zel se tiin, harsatna awm palh theite inhrilhhriat zung zung ṭhin nise a ti a. Sawrkarin lockdown a puan tak zawmloa palzuttu te hi IPC Sec 188, Disaster Management Act, Sec 51-60 hmanga hrem theih an nih thu sawilan a ni bawk. Targetted Intervention hmanga Champhai AIDS Do Pawl leh Genesaret Home chhinchhiah danin Champhai khawpui chhungah hriau hmanga inchiu thin mi  822 leh khawpui chhehvel thingtlang khuaah mi 106 awm anga chhut an ni a,  mi 100-120 te hnenah  lockdown chhung  tla tur OST  damdawi pek an ni a. Ruihhlo ngawlvei te’n ruihna tur awlsam takin khawchhungah  an hmuh mai loh avangin dan lova ramri kana la tur ven kawngah ngawrh lehzuala tanlak angaih thu meeting-ah hian tarlan tel  ani bawk. 

Vawiin meeting-ah  hian Pu C.Lalengliana, Addl SP,  Official dangte,  YMA hruaitute, VC leh Home lama thawktute an tel a ni.