No.977/2020-2020

Champhai Police te'n kum 2019 August thla leh November thla chhunga Case 9 (pakua) ziakluta Heroin an man khawm hawng 107 (Gram 1366.09), khatih hunlaia tualchhung rate a Rs 52,24,000/- man hu zet chu vawiin chawhnu khan Champhai District Bawrhsap Pu Mark Lalthanliana chuan District Hospital Champhaia thil halralna hmun Incinerator-ah a halral.

Pu Mark Lalthanliana chuan vawiina ruihhlo thahnem tak halral chuan thalai ruihhlo bawiha tang mekte nun pahnih khat tal a chhanhim a beisei thu a sawi a, Mizorama thalai tam tak suattu ruihhlo thahnem tak man a nih theihna tur leh halral a nih theihna tura hmalatu Champhai Police te chu fakawm a tih thu a sawiin an chungah lawmthu a sawi bawk.

Champhai SP Pu Rex Zarzoliana Vanchhawng chuan ruihhlo hal hriatpui tura kalkhawmte chungah lawmthu a sawi a. Champhai District chhungah thawhhona tha tak a awm thu leh Covid-19 hripui do kawngah pawh lantir mek a ni, a ti a. Ruihhlo mante rei tak kawla chhe palh thei anih avang leh Sawrkarin Court-a trial a nih laia tihral a phalsak avanga halral an nih thu a sawi a. Mizoramah ruihhlo lo lut ru a la awm em tih zawhna Champhai Police-te'n an dawn reng thu sawiin, Champhai Police te hian ramri kana Mizorama ruihhlo lo lut turte theihtawp chhuaha an ven reng thu leh ruihhlo tawlhruk tumte tha thlah lova an ven chhunzawm zel tur thu a sawi bawk.

Dr. Zatluanga, DMS Champhai pawhin thusawiin, ruihhlo ngai te'n nunphung pangngai an zawh loh avangin hmangaih taka enkawl an ngaih thu a sawi a. Dan lo a ramri kana ruihhlo tawlhruk thin do kawngah lungrual taka kan zavaia theihtawp chhuah angai ani, a ti bawk.

Champhai Police-te chuan Champhai District chu ruihhlo tawlhrukna kawng a nih thu sawiin, ruihhlo engemaw zat man nei mahse man chhuah loh tam tak a awm an rin thu an sawi a. Covid-19 avanga inkharkhip a nih atangin ruihhlote tlem chho viau mahse tun hnai lawkah Zokhawtharah Heroin hawng 24 (Gram 328) Rs 4,80,000/- man hu leh Metamphetamine Gram 960, Rs 4,50,000/- man hu man chhuah a la nih thu an sawi a. Tlawmngai pawl, khawtlang mipuite leh dan kengkawhtute inkarah tanrual angaih hle thu tarlangin, ruihhlote hian kan thalai tam tak nunna a la suat zel dawn a ni tih hre thara tanrualpuiah mipuite an sawm a. Ruihhlo tawlh ru leh rinhlelh an hriatte thuneitu lamah a rang thei ang bera hriattir thin turin mipuite an chah a ni.

Ruihhlo halralnaah hian Champhai DC Pu Mark Lalthanliana, Champhai SP Pu Rex Zarzoliana Vanchhawng, Addl SP Pu C. Lalengliana, SDPO Pu C.Lalsawta, DSP Hqtrs Pu Lalengliana Chhangte leh Police Officer dangte bakah Dr. Zatluanga, District Medical Superintendent, Dr. Lallawmkima DIPRO, Dr. Thangsailova Colney, Dental Surgeon leh Chanchinbumite an tel a ni.