1462/2022-2023

Champhai, the 4th August, 2022: Vawiin chawhma dar 10:30 khan Samagra Shiksha, Champhai District leh Science Teachers' Association Mizoram (STAM) tangkawp hmalaknain Children's Science Congress 2022 chungchang inhrilhhriatna District Level Sensitization Workshop on Science Congress 2022 chu Education Training Hall, Champhai Kahrawt-ah buatsaih a ni.

He hun hmanpuitu DEO & District Project Coordinator, Samagra Shiksha, Champhai District Pu TT Laltanpuia chuan Science avangin khawvelin hmasawnna lam a pan zel tih sawiin, "Khawvel thang zelah keini pawhin hma kan sawn ve zel a tul a, Zirlaite thinlungah engtin nge science subject pawimawh zia hi kan tuh theih ang tih leh engtin nge harhtharna kan chan theih ang tih hi kan ngaihtuah a tul a ni" a ti a. Khawvel hmasawnna kawnga koritu bertu chu Science a nih avangin Sawrkar laipui pawhin Science-a hmasawnna hi a ngai thutak hle tih sawiin, "Khawvel changkanna um pha ve tur chuan Science-ah kan thanharh ve zel a ngai a, Zirtirtute sukthlek apiang hi Zirlaite sukthlek a nih ve zel avangin zirlaibu chhunga awm mai bakah hma an sawn theihna tur thildang pawh kan zirtir tel a ngai a ni", a ti bawk.

DEO chuan khawvel nuam zawk kan siam theihna tura pawimawh ber chu Science and Technology a nih thu sawiin, "Science-a hmasawnna avangin tha leh hun pawh kan seng tlem tial tial tawh a, Science thiamna a san poh leh khawvel leh mihriningten hma kan sawn zel dawn a ni", a ti bawk.

He hunah hian Champhai khawpui chhunga zirna in hrang hranga Headmaster leh Science Subject Zirtirtute kohkhawm niin inhrilhhriatna hun hman a ni a. School naupangten Science Subject-a tuina an chharchhuah ngei theih nana hma la tur leh Children's Science Congress 2022  a hlawhtlin ngei theih nana theihtawp chhuah turin kalkhawmte hi chah an ni.

Understanding of Ecosystem for Health and Well-being tih thupui hmanga inhrilhhriatna hun buatsaih hi Pu Nelson Khiangte, Academic Coordinator, Champhai District-in a kaihruai a, Pu Lalrongura, District Coordinator hnen atangin report ngaihthlak a ni a. Zirna in hrang hranga Headmaster leh Science Subject Zirtirtu kalkhawmte hi resource person Dr. Laldinpuia, Asst. Professor, Centre for Disaster Management, Mizoram University-in a zirtir a ni.

Children's Science Congress hi National Council for Science and Technology Communication, Department of Science and Technology, Govt of India programme pakhat niin, Scienctific Method hman dan inzir nana hman thin a ni a, kum 2 chhungin focal theme pakhat hman thin a ni. State Level Science Congress-ah Champhai pawh kum tin tel thinin National Level-ah pawh Project 15 chuang an nei tawh a ni.