1312/2026-2027

Dated Champhai, 7th July 2026: PHED leh Art & Culture Secretary, Special Intensive Revision puala Electoral Roll Observer Pi Zodingpuii hovin DC Conference Hall, Champhaiah meeting neih a ni.

He hunah hian Champhai Bawrhsap leh District Election Officer ni bawk Pu Mohammad Aaquib chuan Election Observer chu lo lawmin a hun hlu tak senga Champhai a tlawh theih vangin lawmthu a sawi a, Election Officer Pu Ngulzathuama'n Special Intensive Revision kalpui tawh dan te, Draft Electoral Roll-a hming chuang zat leh ERO/AERO leh mi dang hna thawh dan te a tarlang a. Hemi zawh hian Observer Pi Zodingpuii chuan kalkhawmte an duh duh zawta sawi turin a sawm a, pawl hrang hrang aiawha lo kal - MJA te, MUP te, YMA te, political party hrang hrang te chuan an vei zawng te, an hriatthiam loh te leh an sawi duh hrang hrang te an sawi a, Observer te, DEO te, EO te leh ERO te'n a theih ang angin sawifiahin an chhan sak a ni.

Observer Pi Zodingpui chuan Champhai District chu ramria awm an nihna angin fimkhur lehzual a tul thu a sawi a, Enumeration Phase a zawh takah chuan claims & objections period a inhawng ta a, he hun chhung hian mipuiin an hming en chiang a, thil dik lo leh felfai lo a awm a nih chuan hotute hriattir vat turin a chah a. Hemi hun chhung hian Village Council te leh tlawmngai pawl hrang hrang te mipuiin an hriattur an hriat ngei nan theihtawp chhuah turin a chah a, ERO leh AERO te pawhin dan ang taka dik taka ro rel turin a fuih bawk a ni.

Claims & objections period hi July ni 4 atanga August ni 4 thleng a inhawng ang a, hemi hun chhung hian Draft Electoral Roll- a dik lo hrang hrang chinfel a ni ang.