Vawii khan DC Conference Hall, Champhaiah inthlanpui vuakveta Model Code of Conduct bawhchhiatna awm thei ang chite thlithlaia vengtu tur Static Surveillance Team-te pualin a thawhhnihna turin training buatsaih a ni.

He hunah hian Pi Ethel Rothangpuii, RO, 21-Lengteng & 23-Champhai North Assembly Constituency chuan  naktuk maia election notification chhuah anih tawh dawn avangin a tulna apianga chetla vat thei tura  inralrin vek angaih tawh thu a sawi a. Pu Lalremruata Kullai, Election Officer, Champhaiin Static Surveillance Team-te mawhphurhna leh duty tlangpui sawifiahin dik leh fel fai taka inthlanna neih anihna tur leh sum uchuak taka hman anih lohna tura team tinte mahni duty hlen chhuak theuh turin a chah a. Pu Lalbiakkila Addl SP & Nodal Officer, Police Management-in Police-te hnathawh tur leh mawhphurhna, record vawn dan  bakah thil man leh dapchhuah kawnga chet lak dan turte a sawifiah bawk a. Heng bakah hian mamawh leh harsatna awm thei angte sawiho niin a chinfel dan turte pawh ruahmanna siam a ni.

Champhai District chhunga Assembly Constituency 5 tinah Static Surveillance Team 2 zel an awm dawn a, Team tinah Sector Magistrate 1, Police Officer 1, Videographer 1 leh Central Armed Police Force (CAPF) mi 5 ang zel awm tura ruahman a ni a. Venhim hna thawktu tur CAPF te pawhin nimin piah zan khan Champhai an rawn thleng fel tawh a ni.