No.4711/2020-2021

Vawiin chawhma dar 11:00 khan Champhai Bawrhsap Pi Maria C.T Zuali hovin I&PR Conference Hall, CHANEM building-ah Taxi leh Auto Rickshaw fare bituk chungchangah inrawnkhawmna neih a ni.

Bawrhsap Pi Maria C.T Zuali chuan Taxi leh Auto Rickshaw khalhtute chu khualzin leh mikhualte'n Sawrkar thuneitute aia an hmuh tam leh a hnek tam zawk an nih avangin Champhai hmel lanna tak tak an ni tih inhria a, rate chungchangah pawh mikhual an nih avanga lo bum mai ching awm mahse rinawmna kawngah inzirtir uar thar turin a chah a. Lirtheih khalh chu an eizawnna ni mahse mipui rawngbawltu an ni tih in hre reng tur leh mirethei atanga mi hausa ber thleng pawhin phur mahse hawihhawm taka lo chhawn zel turin a chahin an motora chuang te chu an tan VIP an ni tih hre reng turin a chah a. Champhai chu Mizorama Lirthei tamna ber pawl nimahse Document fel lo tamna ber a nih thu sawiin lirthei kan nei a nih chuan sawrkarin a phut angin khua leh tui tha chuan dan angin engkim tih a ngaih thu a sawi bawk.

Pi Maria C.T Zuali chuan Champhai khawpui a lo nawm zawk theihna tura mawhphurtu pawimawh ber chu Champhai mipuite an nih thu sawiin khawpui nuam ni tur chuan khawpui lailia inhnawhkhawm tut lova engkim a inremfel vek a ngaih thu a sawi bawk.

Meeting-ah hian Pi R. Lalnunkimi, DTO Champhai chuan Mizoram chhungah Taxi leh Auto Rickshaw fare in ang tlanga hman a nih theihna tura State Transport Authority-in rawtna thlen tura a tih ang thukhawm an nih thu a sawi a.

Meeting chuan Taxi fare atan tlanchhuah tan atanga chhiara Km 1-ah Rs 50, a hnu leh kilometre khat zelah Rs 40 leh zan lam rate-ah chhun rate aia za zela 50 (50%) a sang ni turin STA -ah rawtna thlen nise tih a ni a. Auto Rickshaw fare atan tlanchhuah tan atanga chhiara Km 1 ah Rs 30, a hnu leh kilometre khat zelah Rs 20 leh zan rate-ah chhun rate aia za zela 50 (50%) a sang ni turin STA -ah rawtna thlen nise tih a ni bawk a. Heng baka Fare dang chu DTO kaihhruainain, Police, Consumer hruaitute lehTaxi leh Auto Rickshaw khalhtute'n dawhkan kilhovin lo sawiho se tih a ni a. Meeting chuan Champhai khawpui chhung lirthei tawt lutuk tur a ziawm theihna turin Taxi, Auto Rickshaw leh Sumo Stand-te September ni 7, 2020 ah enho nise an ti bawk.

He meeting-ah hian mahni chauh indah pawimawh bik lova, mipuite leh lirtheia eizawngtute that tlan dan ber ngaihtuah a tul thu tarlan niin, Pawl leh Sawrkar thuneitute inkara thu inhmuh loh palh a thlen changin thuneitu sang zawka intlankhalha, inchungtlakna thleng lova, District chhunga chinfel theih chin chu chinfel hram hram tum a pawimawh thu tarlan tel a ni bawk.