No.534/2020-2021

Inkharkhipna kalpui mekin a nghawng Champhai Sub-Division Horticulture huamchhunga Loneitute hnenah vawiin khan Sub-Divisional Horticulture Office kaltlangin thlai chi a thlawna semchhuah a ni. He hun hi BDO Champhai Pi R. Lalnunkimi chuan a telpui a ni.

Pi R.Lalnunkimi chuan sawrkarin Loneitute tan a thlawna thlai chi a semchhuak chu lawmawm a tih thu sawiin, thingtlang hmun hla zawka Self Help Group-te pawhin an dawng thei tur chu lawmawm a ti a. Thlai chi dawngtu Loneitute chu an dawn ang angte tangkai taka hmang tura chahin, Sawrkarin a tih tur a ti a, Loneitute pawhin hlawhtlinna an neih theihna tura an tih tur an tih ve angai tih sawiin, duhsakna a hlan a ni.

He hun Sub-Divisional Horticulture Office, New Champhai tuala neih hi Pu Vanlalvuana Rokhum, SDHO Champhai chuan a kaihruai a. Pu Vanlalvuana Rokhum chuan Covid-19 hrileng mek vanga kuthnathawktute harsatna tawh mek chu sawrkarin a enliam mai mai thei lo a, an mamawh zawng zawngte pe vek thei lo mahse theihtawp a chhuah pui zel tur thu a sawi a ni.

Horticulture Department kaltlanga thlai chi sem chhuh hi Loneitute hian an hlut hle a. He hunah hian Loneitu thahnem tak an pungkhawm a, felfai taka intlartir niin, Hmarchapui (Chilli), Changkha (Bitter gourd), Bawrhsaia be (Lady’s finger), Bean thu (Cluster bean), Fanghma (Cucumber), Behlawi rah sei chi (Long yard bean), Bean (Cowpea), Bean lian chi (Bean), French Antam (French Mustard) chi te chu Loneitu pungkhawmte hnenah hian semchhuah a ni.