2757/2024-2025

Champhai, 29th October: Vawiin chawhma dar 10:00 am khan Art & Culture Department leh Mizo Academy of Letters (MAL) tangkawpin an buatsaih ‘Thu leh Hla Kutpui’ (Literary Festival) chu Govt.Champhai College Multipurpose Hall, Champhaiah neih a ni a. Pu C. Lalsawivunga, Hon’ble Minister, Art & Culture Department etc. chuan khuallian niin a hman pui. 

‘Thu leh Hla kutpui’ hawnna inkhawm hi Pu VL Remliana, DC. Champhai chuan a kaihruai a, Pu F. Lalthanmawia, Dy Director, Art & Culture Department chuan Report pe in Khuallian Pu C. Lalsawivunga chuan Seminar hawnna thu a sawi a, Pi Zonunthari, Joint Secretary, Art & Cuture Department chuan lawmthu sawina hun a hmang bawk a ni. 

Khuallian Pu C. Lalsawivunga chuan Seminar hawnna thu sawiin, “Mizote hian kan history kan ngaihpawimawh thar a, history dik nei tura tan kan lak a tul a, tuna ke kan pen loh chuan thang lo thar zela kan thlah te chu kan History hriatna kawngah an dal anga, hawi lam tur bik hre lovin an darh nuai mai ang tih a hlauhawm a. Tun hi tan kan lak hun chu a ni a, Art & Culture Department chuan theihtawpin hma kan la a ni,” a ti. 

Art & Culture Minister chuan kan historian hmasa ten thahnemngai takin bul lo tan tawh mahse Sawrkar angin ‘hei hi a dik chu a ni e’, ti a pawm kan la nei lo va, kan zavaia kan pawm tlan theih tur History kan neih theih nan hma kan la a ni, a ti bawk. Kan hnam zia tihhmasawn a, vawn nun zel hi Mizo thalaite mawhphurhna leh kan tih tur a ni a, ram changkang leh hmasawnah chuan an culture a nghetin chu chuan an society a ti nghet em em a, chung mite chuan an hnam chin dan te, an lam leh zaite hmangin khawvelah an inpholang thin a, keini Mizote pawh hian kan culture in hma a sawn theih nan ngaihtuahna kan seng ang a, kan zir chiang ang a, khawvela pholang ve turin hma kan sawn ve tur a ni, a ti. Kan chhehvela hnam thenkhat te chu hnamdang culture in a bawhbeh leh awp beh te an ni fur a, mahni culture zahpui leh ngaipawimawh lo hnam an ding chhuak ngai lo. Tunah hian kan zirlai mithiam tam tak hian kan History hi an khawp kham tawh lo va, research beia kan chanchin zir thar hi an duh a, mumal taka ziak chhiar tur an hmu tam lo va, chung kan hnam tobul, kan nihna dik leh kan chet velna dik tak hriatchian duhna chuan vawiina kan seminar pawh hi a hring chhuak a, History dik leh tha, kan zavaia huapzo kan neih theihna tura tan kan lak hi a tul tak zet a ni, a ti bawk. 

Art & Culture Department leh MAL te buatsaih ‘Thu leh Hla Kutpui’ Champhai-a neihah hian ‘Zofate thlang tlak dan zir chianna’ tih chu thupuiah hman a ni a, Chawhma huna thupui zirhona hi Dr. Zoramdinthara, Gen Secy. MAL-in a hruai a, “Zofate thlang tlak dan – Lungphun hmanga zirchianna’ tih thupui hmangin Prof. Malsawmliana, Dept. of History, Govt., T. Romana College-in paper a present a. Chawhnu hun hi Dr. H. Laldinmawia, Asst. Secy., MAL in a kaihruai a, ‘Zofate thlang tlak chhan leh an thlang tlakna kawng’ tih thupui hmanga Dr. Malsawmdawngliana, Asst. Professor, Dept. of History, Govt., Aizawl West College-in paper a present ngaihthlak a ni a. Heng thupui te hi sawihona tha tak neih chhunzawm a ni. 

Pi Carol VLMS Dawngkimi, Director Art & Culture Department chuan Seminar kharna programme a kaihruai a, Pu Lalthamawia Bolchhim, Asst. Prof., Govt. Champhaia College kaihhruainain chanvo neitute hnenah Memento leh Certificate sem a ni a; He Seminar-ah hian mi 275 an tel a ni. Thu leh Hla Kutpui-ah hian Mizoram Publication Board, Art & Culture Department chuan lehkhabu an tih chhuah tawh engemaw an pho chhuak a ni.