4110/2023-2024

Champhai, the 9th March, 2024: Tribal Co-operative Marketing Development Federation of India Ltd. (TRIFED) leh DC Office, Champhai tangkawp chuan vawiin khan Vanlallawma Indoor Stadium (VANIS), Kahrawt Veng, Champhaiah Tribal Artisan Empanelment Mela a buatsaih.

He hunah hian SDO Sadar & DUDO Champhai Dr. Manesia Khaimeichho chuan mela neih a nih chhan leh kalphungte a sawifiah a. TRIFED  atanga lokalte'n local artisan-te kawmin an thil siam chhuahte an zirchiang a, tul leh pawimawhte an hrilhhre bawk a ni.

Vawiin Tribal Artisan Empanelment Mela buatsaihah hian Champhai District chhunga mahni kut themthiamna hmanga thil siam thin Local Artisan 31 te telin an thil siam leh neih angte an pho chhuak a. TRIFED aiawha lokal Pu Jahan Singh, Senior Accountant, Pu Mrinmay Roy, Executive Assistant, Pu Rahul Das, Executive Assistant leh Pu Neeraj Kumar Singh, SPS te bakah TRIFED thawhpui North Eastern Handicrafts & Handlooms Development Corporation Limited (NEHHDC) aiawha lokal Pi Neetu Gogoi, Product Designer te'n an thil phochhuahte TRIFED guidelines zulzuiin an endik a ni.

Local Artisan-te hi TRIFED chuan empanelment neihpui bawkin tha an tih angte chu a sample an lei sak a, hengte hi thiamna bik nei mi hrang hrangte awmna PSP Committee, Guwahati-in a lo zirchian atan leh tul anga a lo bawhzui turin an thlen dawn a; thil dehchhuah quality, packaging, labelling, rate leh thil danga hmasawn ngaihna a awm ni a an hriat chuan a hranpain training an siam sak leh dawn a. Local Artisan-te thil siam chhuahte zau leh tam tham zawka zawrh chhuah a nih theih nan kawng an dap zui dawn a ni.

Tribal Artisan Empanelment Mela in a tum ber chu India ram hmun kilkhawr zawka tribal mite'n an mahni kutkawih themthiamna kaltlanga an thil siamte phochhuahna remchang siam sak leh eizawn nana an hman theih tura hmalak sak a ni.

TRIFED tarlan danin Tribal Artisan Empanelment Mela thawhkhatna kaltlangin Aizawl, Serchhip, Hnahthial, Lunglei leh Lawngtlai-ahte mela buatsaih a lo ni tawh a. A thawhhnihna kalpui mek niin, Khawzawlah zawhfel tawh a ni a, vawiina Champhaia neih bakah hian Mamit leh Kolasib-ahte neih a ni dawn bawk a, mela la neih lohna District dangahte pawh neih chhoh zel tum a ni.